有很多人不明白，在政府全面撤辣之後，樓價稍作反彈之後又打回原形，現在不少評論員已經改變預測，認為今年樓價有機會下跌10%，至於點解會下跌，評論員又唔講，其實，樓市升跌是很正常，最緊要是知道樓市點解升，或者點解下跌。
我認為樓市下跌最大原因，就是銀行唔借錢俾人買樓，有不少業主已經將物業賣走，但最後未能成交，原因是買家冇辦法搵到銀行做按揭，最後唯有撻訂，業主在殺訂之後，可以將售價降低，無形中令到樓價下跌，如果銀行願意
做按揭，第一買家就不用撻訂，樓價就不會下跌，不過，銀行的睇法唔同，銀行家會認為，好彩冇借錢俾第一個買家，否則，抵押品的價值降低，銀行的風險相應提高，估計會受到總行嘉許，其實，銀行正在毁滅自己的客戶，當市況回復正常，銀行願意做生意，便會發覺自己手上客戶減少了很多，要call 返那些客戶，真的是很困難。
有大銀行話，就業人數減少，影響市民消費，至於點解就業人數減少，大銀行又冇講，其實，主要原因是銀行唔借錢俾人做生意，就業人數又點會上升，有不少做緊生意的業主，因為被銀行call loan call得急，唯有將做緊生意的物業賣走，將生意結束，冇人做生意，就業人數又點會唔減少，消費自然減少，銀行咁講，好似事不關己，有多少講風涼話。
銀行可能做慣由政府擔保的生意，利息收得高，基本上沒有壞帳，疫情過後，政府不再擔保，相比政府擔保的貸款，其他貸款即使有足夠的抵押品，銀行都冇興趣去做，所以不斷call loan，搞到做生意的人冇哂興趣，寧願優哉游哉，唔做生意，食下高息，無謂被銀行call loan，對於就業減少，消費減少，都費事理。
