昨日中午，一個人享受男人的浪漫，食碟豆腐火腩飯，有老友問我點解咁奇怪，佢剛剛見到我班同事大魚大肉，而我又咁慳，我話同事食飯都是我找數，如果我與同事一齊食，他們反而唔開心，不如替他們找數，等他們食得開心啲。
本來我是與同事一齊食，但我發覺，同事們不但疏於發言，仲唔敢起筷，最後剩返很多餸，有一次我有約遲到，
發覺所有點心，燒味，小菜甚至干炒牛河，全部都清哂，我知道自己不在現場，同事會食得開心啲，自此之後，我唔會與同事食飯，只負責找數。
有老友同我講，台灣網民話黃仁勳非常懂得請客，請業界食飯是4800元台幣一席，請員工食飯是18000元台幣，因為黃仁勳知道，業界只是希望與他一起食飯，並不在乎菜式是什麼，幾多錢一席，請員工食飯就要食好啲。
我話如果台灣網民真係咁講，只是台灣人與香港人請客態度不同，雖然名貴菜式並不代表尊重客人，但亦不能太過普通，否則就是待慢客人，4800元台幣大約等於1200元港幣，以黃仁勳身家，簡直是侮辱客人，況且很多時在名人請客之後，會有很多人複用那張菜單，好似耶倫在北京的菜單，那張菜單用了不少次，如果黃仁勳用請員工的菜單請客，會為那間酒家爭取到不少生意。
至於請員工的菜單，我不敢批評，不過，黃仁勳可能唔知道，員工是不喜歡與老闆一起吃飯，所以，黃仁勳最好到一到，打個白鴿轉，讓員工自己食，氣氛會熱鬧很多，唔到你唔信。
