近日社會氣氛唔係幾好，不時有一些跳樓自殺新聞，令我想起，如果買樓，尤其是銀主盤，可能出現一些不可預見的危機，如果原業主輕生，令單位變成凶宅，單位即時大幅貶值，買家就損失慘重，所以，如果單位因原業主輕生而變成凶宅，買家有權唔成交以及取回訂金，如果銀主唔同意，買家真係要三思。
五代十國，南唐李後主亡國之後，寄居開封府，宋太宗趙光義不時要求小周后入宮侍寢，小周后知道入宮之後，李後主情緒必然低落，於是叫李後主唔好去露台，切記獨自莫憑欄，恐怕一時想唔開跳樓，後來李後主憑意寄歌，寫了一首浪淘沙，最後竟然變成鳳閣恩仇未了情的歌詞，獨自莫憑欄，無限江山，別時容易見時難，流水落花春去也，天上人間。
我自己試過，賣出第一個自住單位，雖然賺了很多錢，但情緒非常低落，自己都唔敢行緊露台，萬一一時想唔
開，咁就大件事，情緒低落原因是知道要買返類似單位，可能要多付一兩成樓價，甚至永遠都買唔返，從此以後，我只會在換樓時才賣走自住單位，不過，就算是換樓，又賺錢，情緒仍然唔多好，所以，以後可以能夠唔賣就唔賣，我並不是睇好樓市，我只是唔想自己情緒低落。
不少人閙報紙唱衰樓市，只會報道蝕本買賣，對於賺錢的就隻字不提，最多只是輕輕帶過，並且話新買家是接火棒，我覺得那些人是怪錯了報紙佬，報紙佬知道賣樓的人情緒非常低落，隨時會做傻事，所以，報道一些樓市負面消息以及話買家接火棒，安撫被迫賣樓的人情緒，簡直是功德無量，至於買樓的人就不用擔心，他們是處於亢奮狀態，小小負面報道打擊唔到他們。
