近兩年樓市唔好，不時有物業代理給我一些低於市價荀盤，代理仲話，如果嫌樓價仍然太高，可以鋤下價，就算大力鋤價都冇問題，業主唔接受可以唔買，就算業主接受，仍然可以搵一個理由唔買。
雖然樓價的確很荀，但在這個大環境下，可以說是現金為王，揸住現金並不是打算執死雞，而是保護自己的物
業，現在銀行call loan call到失魂，如果冇現金在手，隨時被迫賣走自己手上最優質的物業，如果鋤價，萬一業主真係賣，而自己又唔買，除了會畀人鬧之外，更加在無形之中將自己的物業貶值，因為其他人會覺得，業主大幅降價，仍然不能將物業賣走，代表物業價格下降，最後有機會令到銀行向自己追收差額，所以，如果唔打算買就千祈唔好鋤價，鋤別人價最終變成鋤自己價。
如果打算買甚至一定要買，除非鋤價鋤得深，否則就千祈唔好鋤價，如果唔鋤價，主動權在自己手上，為一兩個百分點鋤價，即是將主動權送俾對方業主有權收回不賣，以後再買就要畀多很多錢，我亦有類此情況，唔記得幾耐之前，有代理游說我賣走一個單位，買家是同一樓層另一位業主，最後我同意代理提出的樓價，誰不知買家見到代理咁快就可以完成工作，以為我急住賣樓，於是鋤價兩個百分點，並且話這是他老婆的意思，希望我可以𠱁下佢老婆，其實，我簽了買賣合約之後亦非常後悔，因為那個物業有非常優厚的潛質，不過後悔還後悔，如果對方簽名確認，我就一定要賣，但對方竟然反價2%，我多謝都冇句，立刻表示唔捨得賣，就算對方加回2%都唔賣，整單交易就是如此這般被終結。
一個終結是另一個開始，半年之後，那位買家私底下搵我，並且將買價提高五成，佢希望我能接受，等他可以狠狠打佢老婆一巴掌，我見價錢很好，於是成人之美，買家亦非常開心，他可以將兩個單位打通，變成一個相連單位，其實，我非常多謝買家老婆，如果佢唔鋤價，我賺少很多錢。
