不少人認為是秦始皇統一六國，其中最著名戰略是遠交近攻，其實，秦國經過六個君王，最後由秦始皇贏政統一六國，而著名遠交近攻亦不是秦始皇戰略，而是秦昭王時代，宰相范睢所提出策略，亦是現今中國的一帶一路啓蒙版本，本文不是講一帶一路，所以就此略過。
一般歴史學家認為，秦國是戰國七雄中最強大，推行遠交近攻是理所當然，其實，小國更加了解遠交近攻，如果同一個冇雷公咁遠的強大國家結盟，到最後如果受到鄰國攻打，那個強大國交根本欲救無從，所以，一個小國千祈唔好得罪鄰近國家，尤其是比自己大以倍數的國家，否則最後受損的是小國自己，最好的辦法就是與週邊國家結盟，蘇秦亦做到除了秦國之外，其他六國結盟，甚至六國大封相，不過自古至今，結盟最終都會因為小事而瓦解。
在現今世界，歐洲有歐盟，亞洲有東盟，都是為了共同利益而結盟，而結盟之後，亦可以抵禦大國攻擊，東盟
有十個國家，人口超過六億，新加坡是其中之一，但人口只得五百幾萬，人口雖然多，但影響力最大，甚至可以講是東盟的龍頭大哥，做大哥要有一個條件，就是要蝕底，如果做大哥攞著數就收唔到靚，社團亦會瓦解，所以，新加坡如果想做東盟龍頭大哥，一定要肯蝕底。
美國歌壇有一個天后叫Taylor Swift，新加坡在其他東盟成員國不知情之下，以大約一千八百萬美元贊助費取得Taylor Swift東南亞演唱會獨家主辦權，本來都冇事，但新加坡傳媒不斷讚美政府取得主辦權，可以為新加坡爭取到五億美元經濟效益，並且不斷重覆這番說話，顯得其他東盟國家領導人非常之無能，老實說，什麼是經濟效益，是非常虛無飄渺，就算真係有五億美元經濟效益，新加坡傳媒都唔應該日講夜講，搞到李總理不斷要解話，悶聲發大財都唔知。
東盟其他國家反應一定唔好，基本上沒有東盟領導人去睇Taylor Swift 演唱會，甚至比較知名的人士都很少，有人話演唱會好好睇，亦有人話只是一個女版Glen Campbell ，美國鄉村味很重，唔值得山長水遠飛去新加坡睇，其實，TS在亞洲知名度不是很高，就算新加坡唔攞獨家主辦權，東盟其他國家亦未必會主辦，為了一個演唱會而得罪盟友，唔知道分析機構有冇計算在經濟效益之內，在經濟角度來看，新加坡有機會是受惠者，但在政治角度來看，損失將會很慘重。
