政府撤辣後未夠半個月，已經賣了兩千個新樓單位，二手樓亦唔錯，買家要在冇樓睇之下出價，連拍賣場都非常熱鬧，在你爭我奪之下，拍賣物業被搶高三成，贊成撤辣的官員鬆一口氣，因為在撤辣之前，不少外資投行以及測量師話撤辣冇效，樓價會繼續下跌，如果真係撤辣無效，政府唔知有乜辦法可以令樓市復甦，樓市唔掂，地產商就唔會買地，以往仲可以話香港地產商唔買地，有國內地產商買，現在都冇呢支歌仔唱，冇人買地，政府財赤就冇辦法解決，官員們唔頭痛都唔得。
有人話，政府撤辣是冇問題，但點解連SSD都撤，因為撤了SSD，炒家就會出動，政府今次撤錯了，據我收到的
小道消息，政府根本冇打算撤辣，直至財政預算案當日早上才決定撤，已經冇時間審議邊條辣招撤，邊條唔撤，於是全撤，但保留辣招框架，有必要時重推辣招，我覺得有多少多餘，以前都無辣招框架，政府一樣可以出招，但政府咁樣講有一個效果，市民可能擔心政府再出招而盡快買樓，無形中加速樓宇銷售以及推高樓價，但我相信官員沒有這個意思，只是提醒大家唔好炒樓，樓價升得太快政府會再出招。
大多數人認為政府唔應該撤銷SSD，認為是方便炒家炒樓，最終推高樓價，但事實上撤銷SSD是高招，如果政府不是匆忙中撤招，可以說是有高人指點才會撤銷SSD，在撤辣之後，有不少大手新樓貨尾成交，那些買入新樓貨尾的人最終都會將貨尾出售，無形中加大未來供應量，對壓抑樓價有一定作用，就算地產商加價，都唔會加得太狠，而事實上有傳聞話地產商是唔希望政府撤銷SSD，令到買了新樓的人兩年內唔可以同地產商競爭，傳聞是真是假，真係無從稽考，但撤銷SSD的確是高招。
