近日新樓銷售，有很多大手成交，最矚目就是長沙灣新樓盤，有大手客以超過億六掃24個單位，究竟那些是什麼人，理論上香港炒家俾銀行call loan call 到失魂，買三兩個單位還可以，點都唔會買24個咁多。
香港報紙對樓市報道，日日都是負面消息，唔係劈價賣樓，就是業主蝕讓，賺錢的是不會報道，令到打算買樓的
香港人不但不敢買樓，甚至連睇樓都唔敢，恐怕在睇樓之後，俾代理𠼱到要買樓，其實，如果他們去睇樓，就會發覺樓價不是那麼低殘，報紙所講的低價只是佔小部分，而且大多數是銀主貨，財仔低價賣樓是正常不過的事，如果真係要買樓，俾多一成樓價都未必買到，唔認真觀察樓市，又點會認識樓市真面目。
香港人唔觀察樓市，但有心在香港置業的內地人就有唔同做法，他們不時組團來香港睇樓，當政府取消辣招稅之後，他們就會大舉出動，我講大家都未必會相信，在撤辣之後，唔夠半個月大約賣了二千個新樓單位，內地買家接近八成，正是行船爭解纜，今次香港人恐怕失了先機。
現在來港買樓的內地人最喜歡組織觀摸團，以團購力量同地產商爭取最大優惠，而在適當時候又會將所買入的單位摸走，不過唔會賣俾香港人，而是賣返俾國內同鄉，有了穩定客源，觀摸團會越來越多，單打獨鬥的香港炒家將會處於下風，而觀摸團除了新樓之外，亦向二手樓埋手，近日二手樓買賣大幅上升，買家有很多屬於觀摸團，如果香港人仍然處於觀望階段，只睇不買，最後要同內地人買摸貨，本末倒置的事，莫過於此。
