買摸貨的人並不是炒家

　　星期二晚上，消息突傳出匯豐銀行停做摸貨按揭，及後差不多所有大銀行都唔做，有人立刻話令炒家大失預算，樓市始終冇運行。

　　我認為今次銀行殺錯良民，買摸貨的人不會是炒家，而打算炒樓的人是準備full paid，唔會問銀行借錢，因為如果銀行批了按揭貸款，而所買的物業又可以摸走，銀行豈不是白做功夫，一定會對申請人有成見，以後都唔會接受申請，無形中炒家封了自己後路，所以，炒家寧願買少幾個單位，一定要full paid，銀行唔做摸貨對炒家影響不大，在買家完成交易之後，再買俾真正用家，就唔算是摸貨，銀行唔會唔做掛。

　　我估計財爺撤銷SSD的意思並不是鼓勵炒樓，而是為能力不足或者做錯決定的人開一度逃生門，市場上不時出現有一些撻訂個案，就算是大幅折讓的居屋最近都有125個單位撻訂，相信大部分是因為身邊的人危言聳聽，被嚇到撻訂，或者是本身的能力不足，不能完成交易，如果冇SSD，他們可以將單位售予有需要的人，最後不但沒有損失，甚至有不俗利潤，對於那些人來說，撤銷SSD是功德無量，如果銀行唔做買摸貨的人生意，不但令做錯買樓決定的人有所損失，同時亦令到不少人買不到心頭好，浪費了財爺一番好意。

　　有人話，如果銀行做摸貨按揭，令到樓價節節上升，銀行即使遵從金管局指引，最後借出的貸款比正常高很多，其實，這個問題很容易解決，以往亦是這樣做，無論樓價上升了幾多，按揭成數只能根據第一份買賣合約的樓價，換句話說，如果摸貨樓價上升了一倍，按揭成數就會下降一半，銀行更加有保障，我唔明白銀行點解唔做。