過了新十五，拜年或者團拜的活動可以說告一段落，今年到公司拜年的銀行家並沒有減少，不過大多數都是鬱鬱寡歡，甚至可以說是強顏歡笑，一般人都會認為銀行家最近call loan call到失魂，少不免與客戶有磨擦，即使在禮貌上要去拜年，但又點會開心，最怕客戶話借咁少錢，都未及資產價值一半，使唔使咁緊張，call loan call 到失魂。
很多人唔明白，call loan 是銀行家職責，他們只會按本子辦事，唔係賴金管局就會話係銀行風險管理部的要求，
唔會令到自己鬱鬱寡歡，如果call loan都會令自己唔開心，絕對唔適合做銀行，銀行家鬱鬱寡歡是另有原因。
我都做過銀行一段短時間，知道做銀行家的心情，我做銀行的時候，即使是一個職員仔，都會俾人捧上天，大家可能忽略了，一個人最開心就是借錢俾人的時候，一定會被債仔捧上天，就算買債券，一樣會被發債的人捧上天，睇吓許老闆當時對那些買債的人幾咁好，因為買債的人是借錢俾發債的人，不過，開心還開心，借錢俾人最擔心就是債仔冇錢還，開心變成傷心。
銀行家就不用擔心債仔唔還錢的煩惱，因為銀行家所借出的並不是他們的錢，天下最開心的事莫過於借別人的錢俾其他人，現在不但唔可以借錢俾人，仲要追客戶還錢，試問銀行家又有乜辦法唔鬱鬱寡歡，不過，銀行始終要做生意，唔會永遠唔借錢俾人，鬱鬱寡歡只是暫時性，期望銀行家很快變返開開心心，又可以借別人的錢俾其他人。
