上星期去了匯豐的春節酒會，當日福布斯放榜，頭五十位，最少有二十位在酒會，老實說，我本來唔鍾意匯豐CI CEO祈耀年，但自從佢反駁昔日中國大好友羅奇話香港已玩完之後，認為祈耀年非常有吉士，對佢完全改觀，我認為祈耀年要頂住相當大的壓力，才可以反駁羅奇，不過亦要付出代價，祈耀年講完之後，匯豐在業績理想下，股價仍然下跌5%，或者，這是睇衰香港的人對祈耀年發出的一個警告，如果唔跟著劇本講，匯豐有排冧。
不少人相信，現在全世界傳媒正在圍剿香港，好嘅地方當然唔會講，唔好嘅就要post多幾次，彭博話，去年跨國
企業在新架坡設立總部的有4200間，香港只有1336間，香港已經玩完，但彭博有冇考慮，跨國企業在香港設立總部的遠多於新加坡，甚至可以講香港甲廈需求已經飽和，但新加坡仍然有龐大需求，情況就好似大仔增高速速比細仔慢，冇人會覺得奇怪，更何況去年香港才正式解封，一切仍未復常，今年才上力，明年才可以見真章，不過最奇怪的就是2016年已經有這個數據，當年是有4200間跨國企業總部設立在新加坡，與今日一昔一樣，設在香港的總部有1389間，比今日稍多4%，有多少不明白，唔通真係咁啱咁蹺。
既然是圍剿，就唔止羅奇同彭博咁簡單，福布斯都加入圍剿隊伍，福布斯表示，香港房屋產將面臨二十年來最嚴重衰退，而且睇唔到緩解跡象，咁樣講打破我對福布斯認知，我一向以為福布斯只是為富豪秤身家，講排名，唔會做評論，尤其是咁武斷評論，這是福布斯要嚴守的規條，現在連福布斯都放棄自己身份，加入圍剿隊伍，這場仗，香港的確很難打，不過，難打都要打，鬼叫你窮，頂硬上。
