星期一法庭宣布恆大清盤，一切塵埃落定，可以講吓恆大，問吓人點解買恆大債券，我問了十幾個算是有錢佬的朋友，點解會買恆債，是否因為債息很高，答案幾乎是一致，債息高並不是一個主要原因
，而事實上恆債並不是太高息，絕不吸引，由於債息不高，令到他們失去了警覺性，如果債息太高，他們反而會小心一點，就算買都唔會買太多，而真正吸引他們買恆債，就是買恆債的人。
他們的答案我明白，從報紙所見，大量買恆債不單止是粒粒皆星，而是粒粒都是巨星，他們的吸引力根本無法抵擋，他們買恆債，其他人點解唔跟住去買，除非是冇能力。在過去，我亦不時被人游說買恆債，他們並不是說恆債點好點好，而是話邊個邊個有錢佬都買，點解我唔買，有金都唔識得去執，我話我當然識得執金，不過執金不用本錢，買恆債要資金，我冇錢又點可以買恆債，理論上冇錢是推卻別人的最佳藉口。
不過，金融專才的能力又絕非大家能夠想像得到，有專才話，冇錢唔緊要，可以將手上物業做按揭，如果按揭成數超過金管局規定，可以用恆債抵押，只需要付2%利息支出，而收入有6-8%，何樂而不為，老實說，當時我亦打算買恆債，但我可能表現得唔夠積極，銀碼又唔係咁大，專才都冇理我，而且擔心自己又變成專才口中的邊個邊個，所以才打消買債念頭，今日才夠膽講吓恆債，否則，我一樣會保持緘默。
