大家讀毛澤東詩詞，一定會讀到沁園春·雪，江山如此多嬌，引無數英雄競折腰，原來，毛澤東有另一首沁園春·長沙，其實比沁園春·雪寫得還好，原因是毛澤東寫自己心理歷程以及抱負，問蒼茫大地，誰主浮沉？
大家一定很奇怪，我寫地產文章，點解無端端講毛澤東沁園春·長沙，根本風馬牛不相及，我自己都覺得冇錯，但我見到政府重啓移民計劃當日，信置以唯一入標者奪得大嶼山·長沙低密度住宅用地，有感而發，以毛澤東沁園春·長沙為標題，不過亦有其意思，問香港地價，誰主浮沉？
有人不明白，點解信置會是唯一的入標者，其他地產商即使覺得地產市道唔好，可以用低價入標，唔需要棄權，
我相信地產商唔希望政府推出土地招標，因為出低價會影響手上的土地甚至新樓盤樓價，但又冇理由出高價買地，所以索性唔入標，冇人落標政府就要收回土地，沒有土地供應，樓價總有一日因土地供應短缺而回升，但地產商唔記得香港土地是誰主浮沉，政府試過上一次零入標之後，今次一定會賣，即使價低都會賣，何況這是一幅很細地皮，就算政府接受非常低價亦不會有很大損失。
不少人話信置執平貨，其實又唔係太平，只比估值下限少了10%，在這個環境下其實已經唔錯，如果今次又流標，地產商以後如果唔想政府賣地，就會聯手不入標，或者入一個非常低價錢，以後賣地主動權就會落入地產商手中，這是政府不會容許的。
政府重啓移民計劃，其實已經向地產商伸出友誼之手，但地產商未必會作出反應，唔入標或者用非常低價入標，政府都冇辦法，但政府接受低價入標，地產商如果入標就會比較進取一點，否則，地皮可能會由其他地產商奪得，咁就唔抵，我估計以後有地皮招標，都唔會出現零入標情況，而且地價亦不會太差，香港地價始終由政府主宰浮沉，地產商就好似鷹擊長空，魚翔淺底，萬類霜天競自由，各自以自己能力落標。
