曾經有銀行家同我講，在香港做銀行是最安全，基本上不會在沒有抵押下借錢出去，就算沒有資產抵押，都要政府擔保，已經很少聽到有銀行出現巨額壞帳，銀行沒有壞帳，究竟是好是壞，很難作出一個定案。
好話唔好聽，香港被稱為世界金融中心，但銀行如果連錢都唔想借，淨係叫客戶買金融產品，又點可以稱為世界金融中心，就算做世界金融產品中心都唔得，一定唔夠新加坡砌。
在紐倫港變咗做紐倫坡之後，代表香港失去了世界金融中心地位，但不用太悲觀，香港可以做世界
當舖中心，而現在香港銀行家做法，完全與當舖一樣，或者某一日在香港的銀行家會被稱為朝奉，任何人攞一個物業去做按揭，以前做四成，現在做五成，如果估價下跌，即使客戶按時還款，銀行亦會即時追差額，還唔到就沒收抵押品，當舖反而唔會，在這個情況下，銀行基本上不會有壞帳，所以，世界各地有不少銀行在香港開設分行，理由是以做當舖手法經營銀行，無風無險，生意額又高，搵勻全世界都搵唔到。
我話香港是世界當舖中心只是戲言，但長此下去亦有可能，所以國家金融管理局要派人來港與銀行界商討，如何令香港由世界當舖中心變回世界金融中心，今次一定會無好會，有人形容今次國家金融局是來港向香港銀行家照肺，或者阻止他們變成朝奉，估計在會後，銀行會比較手鬆一些，或者唔會追數追得咁緊，令業主有些閒錢買股票，唔好在指數畀台灣灣道超車，在市值俾印度爬頭，令到香港人都抬唔起頭。
澳門人唔鍾意賭錢，但喜歡去當舖尋寶，那些輸了錢的人趕住翻本，原本值20萬一隻勞力士，賭仔在輸錢後10萬都當，本來，以後加些少利息就可以贖回，但很多賭仔根本冇能力贖回，過期不贖就唯有斷當，澳門人就非常喜歡買那些斷當勞力士，我亦買了幾隻，香港人亦喜歡在當舖尋寶，不過就不是買勞力士，而是買樓，斷當的樓叫銀主盤，級數爭很遠。
時勢艱難，不少在銀行借了錢買樓的業主，未能跟得上供樓，即使借貸不超過五成，只要兩期不供，銀行仍然有權沒收物業，變成銀主盤，經過一輪操作，那些銀主盤就會以低價賣畀一些尋寶人，雖然那些銀主盤是不會對樓價指數有影響，但難免影響買家出價，對樓市始終不利。
老實說，大部份銀行家都唔希望變成朝奉，希望可以以他們的判斷來放貸，何況銀行亦有風險管理部，基本上風險不大，當客戶遇上困難，反而是銀行家大顯身手的時候，如果能夠協助客戶解決問題，銀行家與客戶關係就會更加密切，如果限制放貸比率在五成之內，主動權反而在客戶手裏，他們要求低息與回贈，否則就蟬過別枝，試問銀行家的尊嚴去了那裏。
