有上市公司主席搵我食飯，正是無事不登三寶殿，主席話據他自己了解，他的身家與我老闆差不多，點解我老闆可以上到福布斯，仲排係中游位置，而佢搵人搞了很久，錢亦使了唔少，始終搞唔掂，問我老闆是否用了很多錢。
我話我老闆根本唔知上福布斯，甚至現在上埋胡潤，而亦沒有咁大筆費用畀我去搞，我只是實話實說，上唔上到榜是由福布斯的人話事，與我無關，不過，我知道一件事，由於我們沒有上市，所以比較容易上福布斯。
上市公司主席認為一間上市公司主席，社會地位應該比私人公司老闆高得多，福布斯應該考慮這個理由，上市公司不明白，福布斯最後都要秤身家，私人公司秤資產，上市公司秤股價，如果沒有咁多身家，一定唔可以上到市，福布斯亦要睇到自己個招牌，唔可以亂嚟。
上市公司問有冇辦法上福斯，多多錢都願意使，我話辦法是有一個，雖然要使一大筆錢，但很快就會有回報，就是將上市公司私有化，以主席的上市公司為例，股票市值只有資產淨值四成，如果以一倍股價私有化，我相信成功的機會很大，私有化之後，上市公司真身，上到福布斯並非難事，主席同意我的睇法，但將股價提高一倍收購是很難接受，我話仲有一個比較慢的方法，就是現在趁低吸納，幾個月之後再提出私有化，咁樣會慳很多，不過，如果股市上升，可能再要提價，如果一定要做，早做好過遲做，股市低迷時做好過㷫烚烚時做，但係如果唔將公司私有化，是很難上到福布斯。
