上星期坐國泰去台灣，機場很忙，候機室亦很忙，同行老友話，講數據係冇用，數據話香港經濟下滑，民不聊生，最好去機場睇吓，如果機場人來人往，經濟一定唔會差。
老友講得有道理，但我略嫌慢了些少，我首先睇
銅鑼灣會展中心，如果有很多人在會展搞展覽，香港經濟應該唔太差，在過去半年，我早上跑完步都會特登經過會展，然後返工，我發覺不但每一個星期都有展覽，有時候仲會搞兩場，星期二至四一場，星期五至一是另一場，很多人以為會展就是書展，主力做零售業務，其實是誤會了，會展主力是不同行業搞批發，是非常專業，世界各地買家到會展採購，根本唔歡迎參觀人士，一次展覽可能是一間公司大半年營業額，如果會展暢旺，香港的出口亦不會差，從而帶動全港經濟，在疫情期間我經過會展，見到展覽場地空蕩蕩，實在非常傷心，會展冇展覧，香港亦唔會好得去邊。
每年十二月，香港政府又會搞工展會，地點又係銅鑼灣，正確是維多利亞公園，是零售性質，老實說，工展的展覽品十年如一日，本來是冇乜吸引力，但工展是市民大量採購的好時機，不但香港人買，廣東人以及其他省市的人都會來港大批購買，貪其貨真價平，而且製造商不時做一些推廣，如果工展旺，代表市民有能力消費，而事實上會展在疫情期間亦不是太差，現在更加不用多說，香港人就算未去過會展，大多數去過工展，如果連工展都唔旺就大件事。
在過去幾年，疫情令到年宵花市非常失色，睇香港經濟亦要睇花市，並不是睇有幾多人去花市，以及逛年宵的人消費能力，而是睇年宵攤位拍賣是否激烈，大家可能唔覺得政府在11月已經拍賣年宵攤位，唔等到12月底，較為接近農曆新年才拍賣，政府知道有一句俗語叫陰冬難年，在做冬當日，大約12月22日，如果天氣不佳，又落大雨，過年的時候天氣亦唔慌會好，如果做冬之後拍賣，而做冬當日又落大雨，拍賣價亦唔慌好，今年拍賣成績非常理想，甚至有個別攤位超底價十倍拍出，代表做生意的人對年宵市場非常有信心，而且唔止香港人有信心，內地人亦有信心，因為有不少攤位由內地人拍得，政府賣地應該參考年宵攤位拍賣，有氣氛，有成績，如果年宵攤位用招標方法，我相信收入大減一半都唔止，年宵旺，代表香港人捨得消費，來年經濟亦不會太差。
