政府賣地流標五次之後，本來應該作出改變，但政府依然故我，以招標賣地，結果是落標擦存在感的小型地產商亦不敢落標，結果果是零入標，不但將政府打面，同時亦講畀官員知道，招標是不合時宜，政府應該改變賣地方法，否則，明年就算可以賣到地，都唔使奢想賣得好價，雖然講改變賣地方法，
亦只不過是舊瓶新酒，政府如果擔心有閒言閒語，唔打算用私人協商的方法賣地，最直接方法就是公開拍賣，價高者得，不過亦要設有底價，不到底價要收回不賣，不能夠將公帑來益已經肥過豬仔的地產商。
有人話現在樓市不景，不少業主都要大幅低於市價賣樓，政府亦要低於市價賣地，那些人可唔可以唔了解現在點解有人低於市價賣樓，其實，只是他們投資失誤，投資股票可能唔見了一半，買債券隨時清零，蝕咗錢就要賣樓還貸，平價賣樓是冇辦法中辦法，香港政府雖然有巨額財赤，但財政仍然冇問題，點解要低價賣地。
政府亦知道要地產商出高價賣地，首先地產商可以出售已經完成新樓，所以，政府已半撤辣，又延後甚至取消專才稅，不過，效果不能立竿見影，除非政府容許地產商改變賣樓方法，現在的賣樓方法我真的唔知點樣形容，大拿拿幾百甚至幾千萬買層樓，都唔可以即刻買到，仲要等抽籤，就算抽到都未必買到自己想要的單位，很多人在熾然氣氛之下做錯了決定，最後要撻定收場，無端端唔見了幾十萬訂金，真係喊都無謂，所以，改變賣樓方法亦是大勢所趨。
唔講大家未必知道，現在大約有兩萬個新樓庫存，賣樓要特事特辦，既然有咁多庫存，地產商可以委托物業代理以私人協商方式賣新樓，如果法例唔容許，就應該容許地產商直接公開發售，先到先得，不用抽籤，這樣做才可以快速去貨，老實說，二萬個庫存真係唔講得笑，專才一定可以幫到手，但又要他們抽籤，抽到都未必買到合心水單位，這不是營銷之道。
