有同事話最近睇到一個視頻，一個樓市好友與一個淡友爭辯樓市形勢，視頻中各有理據，很難分辨輸贏，但回應就形勢一面倒，淡友贏10比0，淡友很多人都認識，就是有真材實料的
邵博士，好友不見經傳，不過，回應叫佢做湯博士2.0，同事話，睇完回應，對樓市信心有少少動搖。
我話同事已經幫了我們二十幾年，經歷過唔少風浪，點解咁冇信心，有時候最壞訊息反而是最好訊息，咁多人話樓市大冧，代表他們當中絕大部份還未有樓，如果有樓，尤其是擁有超過一個單位而睇淡樓市，一定會被人質疑，咁多人冇樓，就是樓市上升動力，反之如果每一回應都話自己有樓而睇好樓市，根本是沒有多餘購買力，樓市又點會上升。
同事記得我們最初買停車場拆售，第一次以2800萬買入一個有100個停車位的停車場，打算以40萬一個拆售30個，在拆售之前，同事在屋苑做了一次調查，九成業主表示不會買車位，只有一成是會考慮，收到結果之後，公司曾經考慮過放棄收購，好彩到最後都打消了這個念頭，否則就唔會繼續投資車位，沒有從車位得到的利潤及資金，就沒有以後的發展。
最記得拆售當日，全公司都擔心會不會食白果，我9點鐘回到公司的時候，已經見到一條超過30人長龍，立即截龍，並且作出保證，已經排隊的人一定可以買到，但只限購一個，在7點鐘排頭位的買家原來當日斬釘截鐵話唔會買，因為唔買可以租，到了買車位的時候就話曾經試過買了車租唔到車位，要排隊等咪錶，如果非迫不得已，都唔敢將架車開走，痛苦到不得了，所以今次一早嚟排隊。那些在回應睇淡樓市的人，如果有機會就會第一時間買樓，所以我認為樓市好談辯論，好友似輸實贏。
