我非經常性與一些客戶或者朋友去一些名店食飯，他們見到伙記介紹一些普通菜式給我，覺得很奇怪，因為當他們去到那些名店時，伙記所介紹的都是名貴菜式，有客戶問伙記點解，是否睇唔起我，伙記話唔係，原因是我經常都會去食飯，費事劏我，要劏都會劏一些未見過的生客，其實，做生意有一條不
明文規定，長客冇闊客，闊客冇長客。
政府搞夜繽紛，無論成與敗都值得支持，做地產的人就明白，而且非常羨慕，政府為了打擊樓市炒家而推出辣招，現在不但樓市冇晒炒家，成交量亦大跌，但政府仍然抱著一動不如一靜，至今仍未考慮撤辣，所以政府今次打破慣例為了振興經濟而推出夜繽紛，就算唔支持都唔好柴台。
有人話在夜繽紛夜市，有攤檔賣燒賣，20元4粒太過貴，我認為冇問題，攤檔明碼實價，又唔係以両代斤，唔鍾意可以唔買，唔使鬧到咁大聲，不過亦有人話，20元4粒都可以接受，但雙併就要25元，似乎於理不合，其實，這是做生意手法，去街市買餸，菜心一斤12元，兩斤20元，大家又唔覺得有問題，香港人幾時變得咁小家小種。
有人問我有冇去夜繽紛食燒賣，是否很貴，我話支持政府，早已去了夜繽紛，又買了20元4粒燒賣，貴唔貴我真係唔知道，我只知道如果去夜繽紛都唔買燒賣食，畀人問到都唔知點回答，況且我又不會日日去，下一次去可能已經是一個月之後的事，我並不是常客，做吓闊客都冇問題。
