近日報紙報道關於地產新聞，絕大多數是蝕本賣樓，就算賺錢的都會話止賺，其實，買與賣是相對的，有咁多人睇唔好樓市而賣樓，亦都有同樣數目的人睇好樓市而買樓，有成交，即使樓價下跌亦不是太壞消息。

　　有老友話，見咁多人賣樓又唔見我賣，是否我的物業冇人吼，我話因為我冇買債劵，沒有過量投資股票，所以我不用賣樓，而現在賣樓的人，有不少是因為買了清零或者大幅減值的債券，被銀行追數，由於買債劵的資金是由物業擔保，到最後，唯有賣樓才可以還債。

　　另外一些人雖然冇買債券，但買了股票，現在有不少優質股票比高位時下跌超過一半，而樓價只是跌了10幾個％，亦有不少人賣樓買股，希望股票回復舊觀，他們就可以收復失地，所以，那些人賣樓只是轉換投資產品，並非睇淡樓市，其實，他們慶幸當日有買樓，今日才有能力買股票，如果當日的資金全部買晒股票，今日最少輸了一半，所以，今日賣樓的人，即使是輸錢都是贏家，不過，報紙很少報道賣樓的前因後果，只是話樓市唔好，業主爭先恐後賣樓。

　　無可否認，利息太高，亦是賣樓的原因之一，美國去年暴力加息，令到與美元掛鉤的港元亦要加息，有不少業主的按揭比率太高，利息支出太重，出現負現金流，長期負現金流是業主壓力，有不少業主在迫不得已的情況賣走一些物業，尤其是一些空置單位，減低利息支出，令到個人或者公司收支達到正現金流，才是物業投資者生存之道，並不是那些人睇淡樓市而賣樓，老實說，市場上仍然有不少購買力，不過被辣招鎖死，所以樓價才會下跌，如果政府撤銷辣招，即使樓價唔升都唔會下跌。