有老友話今次真係CY發火，非常小可，CY鬧一個即將去北京受訓的地區公務員，臨行前大排筵席，有幾百人出席送行宴，場面非常壯觀，老友唔明白，既然有咁多人送行，代表那位地區公務員做得非常好，
CY點解要發火，是否CY懷緬當日離任時非常寂寞，見到有咁多人為地區公務員送行，所以發晒大火。
老友未做過官，唔知道官場的潛規則，但我識得不少官員，對於點樣做官亦略知一二，地方官員是執行中央指令，民怨是必然的，就算好似董建華做得咁好，都畀人鬧到狗血淋頭，每一個地方官員在離任時，地區人士知道那位官員已經冇乜利用價值，不但唔會大排筵席送佢走，有時仲會打吓小報告，除非那位官員沒有執行中央政府指令，地方人士得到很大利益，才會搞送行宴，不過，這個送行宴可能斷送了那位官員的前程，而事實上做一個地區人士喜歡的好官真係很容易，除了唔使交稅，同時又開倉派米，一定會受到區內居民愛戴。
做好官有時要玩下手段，除了不能大排筵席之外，有時更加要中途離席，我曾經在內地工作過一段時間，有一次書記約了一大班人食飯，剛剛開始上菜，秘書同書記講有突發事件，書記立刻離座處理，只留低一個非常低級官員同我們繼續飲宴，後來我知道，書記早已知道那件突發事件，他可以直接去處理，毋須去飲宴，但是這樣做冇人知道他當機立斷，中途離席去處理問題，如果中途離席，無論在市民心目中以及中央政府都會加分，為官之道，香港人真係唔多識，以為多人送行就是一位好官，其實，愈多人送行，那位官員愈失分。
