在我細個時，屋企開木廠，對於魯班認識，比一般小朋友多很多，在我讀小學的課本，亦有提及魯班，離不開講魯班的木工技術精細，當中最表表者就是魯班曾經做了一隻木鳥，放上天空飛了三日三夜再回到魯班手中，之後就唔見到有書本提及魯班下半生，就算大家今日去到堅尼地城魯班廟，亦唔見有提及，不過，就了解到魯班本性公孫，單名一個般字，山東人，而山東簡稱魯，所以，大家就叫魯般或者魯班，其他就很少提及，無謂冒犯三行工人。
中國有幾個行業有出類拔萃的人被稱為先師，例如醫術華陀，茶道陸羽，本來易牙可以當廚師祖師，但易牙烹
子滿足齊桓公，廚師唔敢公開承認易牙是祖師爺，魯班是三行，包括建築，木匠，油漆工人的先師，則無人異議，而且在每年農曆六月十三日為魯班先師寶誕，簡稱師傅誕，由於家𥚃是開木廠，魯班亦是木業工人先師，中午要在木業行拜祭兼聚餐，家父早過身，所以我在小學時已經要去木業行拜祭，並且了解到更多課本沒有提及的魯班事跡。
魯班除了是技藝高超的木匠之外，亦是一位軍事家，他發明攻城用雲梯，最後與墨子兵推之下，仍然敵不過以機動性防守的墨子，後人甚至稱之為墨守成規。
有一次師傅誕聚餐，見到打理木業行的是一個老人家，從來未見過他的家人，於是多口問一句，老人家話，由於他睇過魯班經，不能夠有後人，所以冇結婚，當時我不明白，唔結婚與魯班經有什麼關係，後來我睇金庸笑傲江湖，當中有一本秘笈叫「葵花寶典」，在第一頁寫著「欲練神功，必先自宮」，唔通睇魯班經又要揮刀自宮。
我後來搵到答案，魯班經分兩部分，第一部份是教人一些木工技巧，工具的製作，例如墨斗等，一切都很正常，第二部份就教人一些建築術數，因為古代人認為，做一些大型工程，會得罪天地神明，要有一些奉獻，太透徹的描述我唔講，否則有導人迷信之嫌，不過，在第二部份一開始就已經寫著「欲練此術，必先絕後」，所以，我懷疑金庸睇過魯班經，否則就唔會在葵花寶典寫上「欲練神宮，必先自宮」。
至於魯班點會寫上「欲練此術，必先絕後」，一切又要從那隻木鳥開始，傳說魯班做了一隻很大木鳥，可以自由在空中飛翔，有一次，趁魯班不察覺，他的妻子用了那隻木鳥在空中飛翔，由於唔係幾識得控制，魯班的妻子最後跌死，魯班在心傷之餘，認為世人如果要學他的術數，就必須有所放棄，絕後是最可行的，否則就會影響到自己親人，今日所講，雖然略帶迷信，但絕無半點對魯班先師不敬。
