星期六早上，有老友到公司吹水，佢問我在什麼情況下會移民，我話除非特首做埋金管局總裁個位，代表香港的經濟情況不但很差，而且根本不受控制，可能要用政治手段解決，冇人願意做爛頭卒，特首唯有親自落場，老友話我咁樣講，即是永遠不會移民。
老友可能唔知道，如果我是新加坡人，我就唔會咁講，否則就真係要移民，因為已經欽點為下任新加坡總理，現
任副總理兼財長黃循財，在7月8日已經兼任新加坡金管局主席，我問過幾位新加坡朋友，他們都唔知道箇中原因，或者他們知道都唔會講比我知，其實，唔使他們講我都想到，就是新加坡的經濟情況出現變化，上任金管局主席尚達曼劈炮唔撈，而又冇人願意接手，黃循財唯有勉為其難，老實說，如果這件事發生在香港，評分機構一定會減好多分，新加坡當然冇事。
本來，新加坡未上任總理兼任金管局主席是新加坡內政，正是吹縐一池春水，關你差事，但近日新加坡發生不少事，部分與香港有關，所以稍為關心一下，例如淡馬錫主權基金資產縮水5%，或者250億新元，雖然話投資輸贏，閒過立秋，5%當然問題不下，但如果陸續有來，咁就大件事，因為有不少香港人投資新加坡基金。
香港報紙話新加坡基金睇唔好香港樓市，所以寧願撻訂20億，都唔成交長實波佬道單刁，我覺得香港報紙經常是長他人志氣滅自己威風，如果發生在新加坡，當地報紙就會話香港集團冇錢成交，而非睇唔好新加坡樓市。
銀行打開門口，會唔會唔做生意，在香港新加坡銀行將私人住宅按揭利息加2 ％，即是唔想做生意，如果不是有特殊原因，我相信新加坡銀行是不會加息，現在反而是借了錢的客戶有少少擔心，銀行會不會加息甚至要他們還錢。
最後，新加坡貪污調查局磨劍40年，為一宗貪污事件拘捕新加坡高級高員，如果是單一事件還好，如果是總多貪污事件之一，咁就大件事，由此可見，由未來總理兼任金管局主席是有必要的。
