有老友問，最近有專欄作家提及老C同我，不過就冇乜點講我，主要是話老C反差萌，改變對香港樓市預測，認為在大量有資格買樓的年輕人以及業主移民離開，香港樓市牛市永遠不會來臨，雖然
老C最後話是手民之誤，專欄作家唔同意，認為訪問老C的人是他的伙記，在出街之前一定會畀老C過目，又點會有手民之誤，估計是老C心底的說話，是反差萌，究竟甚麼是反差萌。
很多人以為反差萌是網絡用語，當然唔能夠話錯，不過，反差萌原本是日式中文，例如知識份子，地下鐵等。專欄作家一向睇淡樓市，覺得一直睇好樓市的老C不是同路人，突然間聽到老C話樓市牛市永遠不會來臨，嘩，這個反差不得了，覺得老C覺今是而昨非，其實，如果大家有留意到老C評論，他經常反差，年初睇淡，年中睇好，所以到了年尾時，老C對樓市預測一定準確，而事實上經常反差的人基本上沒有反差，不值得大驚小怪。
老實說，老C受條件限制，不能夠唱淡樓市，否則他的伙記又如何叫人買樓，他已經是物業代理界最睇淡樓市的領導人，行內人知道，叫人買樓容易過叫人賣樓多多聲，而事實上賣樓的人大多數都是主動搵物業代理賣樓，否則，代理又有何辦法叫一個業主賣走他的自住單位，老C唱淡樓市即是倒自己米，他肯他的伙記都唔肯。
我同意老C所講是手民之誤，老C點會話樓市牛市永遠不會來臨，甚麼都應該有一個期限，就算結婚時誓言都只會話一生一世，不會講永生永世，所以老C最後修正為牛市今年不會來臨，這才是真正的反差萌，但這個反差萌令到相信他反差的人唔係幾開心，如果我係佢就會話，老C又嚟今日的我打倒昨日的我，反差萌真正的意思。
