今日早上與租務部同事開會之前，大家日常閒談一番，有同事問，布林肯與秦剛星期日傾了5個半小時，昨日又與王毅長談，最後見埋習主席，似乎冇乜進展，但亦沒有壞消息，是否在未來一段時間，中美又傾又砌，但始終沒有
解決問題，是否終須一戰。
我對同事講，又傾又砌，日常工作而已，並不是什麼大件事，連我們都習慣，大國外交更加閒過立秋。當同事與一個租客續租，最初的時候，在租金上一定有分歧，但我們唔希望租客走，租客亦唔想走，於是又傾又砌，甚至到租約期滿，大家仍然未有共識，但唔緊要，只要雙方在現有的條件上各讓一小步，延長現有的租約，之後可以繼續又傾又砌。當租客覺得生意唔錯，或者我們見大形勢不佳，提高或者降低續租條件，最後都可以傾到續約，如果唔傾唔砌，續約的機會就很渺茫，所以，中美又傾又砌，鬥而不破，絕對是好事。
中美關係相比業主與租客不知複雜多少倍，簡單來說，中美各是業主，同時又是租客，如果是業主身份，當然要爭取最好條件，當做租客時，則希望爭取到合理或者較佳條件，中美雙方千絲萬縷，根本分唔開，解決一些問題，又會衍生另外一些問題，永遠都解決唔晒。千祈唔好太悲觀看中美鬥爭，這是世界大局平衡的法則，大家都知道在一個物體找一個平衡點是非常困難，或者永遠找唔到。其實，找平衡點的時候就是一個平衡點，中美現在就是處於這個情況，千祈唔好以為中美會公佈一個對雙方有利的結果。
