有一個新加坡老友來港，他知道我質疑新加坡點解要關了馬場，所以在見面時大讚新加坡政府決斷英明，關了
馬場改建組屋，不但物盡其用，仲可以減少新加坡市民輸錢的機會。
我的確不明白，新加坡有大賭場，點會減少市民輸錢機會，雖然話新加坡人去賭場每次要畀150坡元，但去年收入是1. 25億坡元，代表每年有833,000人次，每日有接近2,300新加坡市民入賭場，不是一個小數目，新加坡馬場入場人數，平均每次跑馬也只得2,600人。如果新政府唔希望市民輸錢，最好辦法是不准市民入賭場。
老友轉了話題，佢話香港應該學新加坡關了粉嶺高爾夫球場，騰出土地起公屋。本來我都贊成，但現在香港發展明日大嶼與北部都會區，土地供應不是問題，點解要在粉嶺高爾夫球場起公屋，話晒都是香港地標之一，而且是一個城市配套，如果不是迫不得已，就千祈唔好改動。老友唔同意，佢話香港政府唔識管理一個城市。
閒話唔講，我於是請老友去食飯，餐廳出品唔錯，地點又好，但客人不多，老友不明白。我話慢慢就會明白，於是灌他飲幾杯老虎啤。老友要去廁所，點知要行到冇雷公咁遠，返嚟之後投訴，經理話本來是有廁所，但老闆話浪費地方，於是拆了廁所擺多兩張枱，請顧客用公廁，但又唔知公廁離餐廳很遠，結果是少了人幫襯，老闆始料不及。
