有老友同我講，美聯儲局今次應該加息壓通脹，抑或減息救銀行，真係好似沙士比亞所講，To be or not to be ，我認為今次有兩個主題，不是生存抑或毀滅，而是一死一生，就算用到大文豪的說話，都唔係幾正確，不如聽下一個新寡文君心底說話。
話說有一個女人剛剛死了老公，在守孝期間，佢老公條屍仍然放在靈堂，聽到外面有人叫賣禾蟲，於是連孝服都唔脫走去買禾蟲，有親友話佢大逆不道，新寡文君話夫死夫還在，禾蟲過造恨唔返，親友無話可說。
鮑威爾現在不是否應該繼續加息壓通脹的問題，如果係，當然可以用To be or not to be ，但現在是繼續加息壓通脹抑或減息救銀行，有兩個主題，用To be or not to be 就唔係幾貼題，應該好似新寡文君話，加息通脹仍在，銀行執笠就救唔返，所以，減息是最正確做法。
現在美國通脹率6%，美聯儲局的目標是2%，就算每次議息減0.5%，都要經歷8次議息，大約到明年今日才可以達到目標，試問屆時有幾多美國銀行已執了笠，我相信數都數唔晒，雖然有人話，美國有5000間銀行，執3、500都冇問題，如果有這個想法就大件事，只要執多幾間，美國銀行系統就會崩潰，冇人會信美國銀行，咁就大件事，而事實上就算美國減息，都未必可以將通脹壓落去，既然不一定成功的事，點解一定要做。
有人會質疑，減息是否可以救銀行，老實說，世事無絕對，不過機會很大，因為現在出事的美國銀行都是買了很多低息美債，在美聯儲局暴力加息之下，那些美債虧損甚大，如果美聯儲局暴力減息，那些銀行就可以逃出生天，如果美聯儲局唔想減息，又想救銀行，都有一個不可行的辦法，就是以面值回購所有低息美債，既然早知道是不可行，不如積極考慮暴力減息，正是即使加息通脹仍在，銀行執笠就救唔返。
