如何將銀主盤賣到好價錢

　　有財仔老友話最近收了一個豪宅銀主盤，唔知點可以賣到好價錢，不少有興趣的買家聽到是銀主盤已經耍手擰頭，莫講話還價，連睇都冇人睇，都唔知點賣，老友可能唔知道，銀主盤當然冇人買，就算有人買都會壓價壓得好緊要，如果借得多可能會輸到入肉，不過，如果話割愛又唔同，隨時可以賣到好價。

　　我話工欲善其事，必先利其器，老友誤會以為我叫佢翻新整間屋，認為太過重皮，唔化算，新買家亦未必喜歡那些裝修，可能會全部拆晒，重新再裝修一次，不但勞民傷財，而且要用多很多時間，降低買家出價意慾，是行不通。

　　我話如果老友唔鍾意裝修間屋，就要用第二個方法，亦有名堂，叫我不入地獄，誰入地獄，老友應該成家搬入去住，不用大裝修，執一執就可以，而且仲不時請一些朋友到家裡飲飲食食，話唔定會有朋友問可不可以割愛，或者他們做介紹人，而且代理不會像其他銀主盤大幅鋤價，如果做足功夫，半年之內一定可以賣走，並且會賣得好價錢。

　　老友可能唔明白，一間屋最緊要是有人氣，有人氣才會旺，那些銀主盤在未收回之前，可能已經空置了一段時間，有興趣的買家一入到去便會感覺得到，連還價都沒有興趣，如果老友可以一家人住上幾個月，整間屋充滿人氣、財氣，想賣走就容易得多。