昨日早上回到公司，未落車大廈主管阿姐走埋嚟搵我，司機立刻攔住，以為有什麼桃色糾紛，我話冇事冇事，我連阿姐叫什麼名字也不知道，她咁急一定有關投資的事問我。
阿姐話今次真係瞓唔著，在去年下半年開始，樓市下跌，除了那些財演之外，身邊的朋友都叫她將自住單位賣走，仲話君子不吃眼前虧，差不多所有財演都話今年樓市會下跌，正是契弟走得摩。
在今年初，當阿姐決定賣樓之後，很快已經有人出價，並且比市價仲要高，物業代理話同佢搵到條水魚，希望可以加多少佣金，誰不知在賣樓之後形勢大變，不少財演已經轉了口風，仍然講今年樓市會跌的已經不多，令到阿姐非常擔心，幾晚都瞓唔住。
我同阿姐講她的確是樓市瞓唔著的人，阿姐唔明白，其實，失眠的人有一個特性，就是成晚都瞓唔著，但臨天光，個天開始見到魚肚白，就立刻瞓得著，仲瞓到唔識返工。老實說，樓市的壞消息已經出哂，利息亦應該見頂，只要等中港通關便一切都會唔同，但唔知點解，有很多人都等唔切這一刻，在壞消息盡出之後賣樓。
如果阿姐有留意樓市，就知道在過去半年樓市成交量只得正常的一半，而且質素大多數都不是咁好，代表持有優質物業的人沒有賣樓，當那些質素不佳的物業貨源減少之後，樓市便會掉頭回升。至於物業代理點解會唱淡樓市，一定要從反方向去思考，如果賣樓的人很多，物業代理不但唔會唱淡，反而會唱好樓市，希望多一些買家入市，他們可以多做生意。至於剛剛賣了樓的人，瞓唔到是很正常，仲有很多晚瞓唔着。
