在一個投資族群裡，在恒指大約15000點時，不少人興高采烈講如何繼續沽空，他們大多數是比較年輕的投資者，於是我寫下估底莫估頂這句老話，族群內有人話這是股市上升時才會講的說話，意思是股市上升是可以無限，大家要賺盡，千祈唔好沽走手上股票，問我是否搞錯。
我當然冇搞錯，在股市上升，大家勝利沖昏了頭腦，贏少啲都唔得，所以會話估底莫估頂。其實，這句說話的
含義並不是叫大家賺盡，而是叫大家唔好沽空，因為沽空即是估頂，而且現價就是頂。雖然很多人話股市仲有得跌，但如果大家知道，25年前恒指比今日還要高，你估有冇人夠膽沽空，我發文之後，股市連升幾日，恒指升超過2000點，今次真係畀人話烏鴉口。不過，股市下跌，他們才可以領會什麼是沽空即是估頂。
前金管局局長任志剛話賣走自住單位即是沽空，我非常同意，但唔知點解，市場上賣樓的人大多數都是將自住單位出售，有幾個單位的業主反而唔會賣樓，他們賣樓的理由是擔心加息，而且仲話差不多全部評論員都話樓市會大跌，樓市又點會唔跌，大約兩三年，等樓市跌定之後，再買返樓一定會用少很多錢。換句話說，他們將會賺很多錢，老實說，我唔知點解他們有咁大信心，就算樓價下跌，都要夠膽買返才可以獲利，不過，那些賣了樓的人睇怕以後都很難買樓，因為很少人將賣樓所得去做定存，大多數人會投資股票或者金融產品，現在我唔講大家都知道是什麼情況，所以，賭乜都可以，千祈唔好將自住單位攞去賭，咁樣做即是沽空，沽空即是估頂。
