政府很久沒有公布現在有幾多間財務公司，我相信是大幅增加，因為有不少有錢佬子女在外國讀完書回流之後，最容易入行又最穩陣的生意就是開財務公司，以有抵押方式借錢俾自己身邊的朋友，不但得到朋友多謝，並且仲可以同其他人講自己是在金融界。不過，借錢俾人的時候是非常開心，但叫人還錢的時候就會面阻阻，隨時老友都冇得做。老實說，如果不是鐵石心腸，千祈唔好做財仔。
有老友同我呻，他的兒子所開的財務公司，遇上債仔還唔到錢，就會沒收他們的物業，變成銀主盤之後公開發售。他的兒子很為那些債仔著想，不時與買家爭取最好的價錢，物業賣走之後大多數有錢剩，雖然唔多，大約是3-5%，老友的兒子是會將賣樓之後剩餘的金錢退回給債仔，但反應很差。有債仔話，既然有幾十萬剩錢，點解唔守多幾個月，萬一樓市反彈，他會損失很多。另外有債仔雖然收到剩錢，亦會質疑物業是以大幅低於市價出售，收到的剩錢分分鐘用嚟請律師反告財仔，老友話，真係好人難做。
老友兩父子都是大好人，不知世途險惡，做財仔已經被標籤為偏門生意，千祈唔好當自己是金融界，既然好人難做，何不做一些假情假意動作。首先，不用咁積極同買家爭取較高價錢，差少少夠還便可以，完成交易之後，債仔仍然可能欠多少款項，財仔在這時候才表現出有情有義的一面，大筆一揮，不用債仔還錢。不過，要債仔簽妥一份兩不相欠合約，如果唔簽，就要找埋尾數，大多數債仔會毫不考慮簽妥有關文件，除了千多萬謝之外，仲會話財仔有情有義。
