一般人講起蘇東坡詩詞，唔係「明月幾時有 把酒問青天」，就係「大江東去 浪淘盡」，其實，蘇東坡有時都會蠱蠱惑惑，例如有一次在過年時，鄰居請蘇東坡寫一副對聯，居士大筆一揮，寫下「福無雙至 禍不單行」，鄰居嚇到暈咗，居士見鄰居暈咗，才慢條斯理寫埋全句，原來是「福無雙至今朝至，禍不單行昨夜行」。
香港因為新冠疫情，封城接近三年，對手新加坡開心到飛起，不但搶了香港在世界金融地位，由紐倫港變了做紐倫坡，仲明正言順搶十一月準備在香港主辦的金融論壇，正當香港人感覺到非常無助的時候，特首突然宣布放寬入境措施，由3+4改為0+3，入境之後只需要做多兩次核酸檢測，以及不能堂食，雖然是有多少不方便，但總好過入境之後
做完核酸檢測就散春，如果入境人士確診，都唔知點樣追尋，相信一般香港人都會接受。
因香港仍未解封，樓價連續下跌10個星期，跌幅超過6％，樓價本來可以企穩或者跌幅收窄，因為有很多未有樓的人亦打算買樓，但是他們過唔到金管局的3％壓力測試，沒有積極購買力，做成樓市承接力不足，樓價下跌亦是正常，金管局唔聲唔聲，突然間將壓力測試由3％下降至2％，䆁放不少初次置業者的購買力，樓市就算不會立刻調頭回升，最低限度都可以橫行一段時間，如果國內購買力湧至，樓市有力作出反彈，今次真係福無雙至今朝至。
雖然金管局降低壓力測試要求，但我略嫌不足，降低壓力測試只是幫助買樓上車人士，對於一些業主就沒有得益，三年疫情，不少業主已經床頭金盡，雖然仍然有不少物業，但礙於逆週期措施，能夠借到的是有限，現實是那些業主有樓冇錢，影響他們正常的生意，如果金管能夠放寬逆週期措施，不但幫了那些業主，對香港經濟亦有幫助，如果金管局可以做到，真的是功德無量。
