有老友不明白，股市跌到阿媽都唔認得，樓市仍然穩如泰山，理論上投資股票的人資質高過物業投資者不知多少倍，應該是股市大升，樓市最多是平穩發展，現在點解會反其道而行，這個世界太不公平。
我投資物業，都算做得唔錯，亦少有名氣，但在一班做各行各業的精英朋友當中，我算是資質平庸，朋友見到一個咁蠢的人在物業市場不但可以搵到食，而且做得唔錯，代表物業市場是一個很容易賺到錢的地方，不少老友亦將多餘資金轉投樓市，有老友甚至多謝我，如果不是我蠢而又可以在物業市場賺到錢，他們絕對不會投資樓市，我唔識得回答，只是認為老友真叻，不但賺到錢又可以取笑我。
股票市場又唔同，裡面太多叻人，我有幾個做股票基金經理的朋友都話很難搵食，我聽到又點會投資股票，久唔久玩票一下，反而有所斬獲，只是財不入急門，並不是我叻過人。
不少人話在股市搵食很容易，只要申請新股，上市之後立刻賣走，賺10-20％是很容易，以前還有機會，現在那些新上市公司股票股價，不少在當日立刻跌破上市價，永遠都返唔到家鄉，新上市公司唔知有心或無意，在公司上市講到前景如何秀麗，上市後立刻發盈警，第一次申請就不知者不罪，第二次就是蠢，第三次是儍，所以，今年第一季新上市公司大幅減少，並不是港交所審批嚴格，而是市場上沒有咁多儍人。
香港股市如此繼續下去，終有一日會追上新架坡，全世界都同意，新架坡什麼也叻過香港，就算大學的排名都比香港高，但有一件事傳媒沒有報導，就是新交所每日成交金額，我講大家都會相信，每日大約10-15億新幣，折合港幣大約60-70億，至於點解咁少，就是新架坡太多叻人，叻人知道在股票市場唔夠人玩，所以就敬而遠之，其實，要股市興旺是很容易，只要俾人覺得蠢人都可以在股市搵到錢。
