星期日早上跑完步，一個人去了一間外表平民，但收費很貴的潮州菜館，收費貴的意思是可以食到很名貴菜式，見到一個麻雀館老闆在座，於是問在解禁後，生意應該很好，雀館老闆話托賴，但剛剛解封時竟然沒有生意，並不是賭仔擔心確診，而是今次禁麻雀館禁得太耐，有五個月之久，不少鍾意去麻雀館打牌的人自己組局，發覺不用抽水俾麻雀館，贏就贏多好多，輸就輸少很多，所以，即使在麻雀館解禁之後，那一班熟客都冇再嚟打麻雀。不過，全街都是賭仔，只要搞一些綽頭，例如在麻雀館打牌，可以嚟潮州菜館免費食飯，客人逐漸多了。唔怪之得，一間咁平民化，可以有咁多名貴菜式，原來是麻雀館找數。
有不少人誤會最好做的生意是開賭，其實不是，開賭只是為了可以抽水。如果可以直接抽水就一定唔會開賭。
冇人會信不用開賭就可以抽水，就算是港交所，搭咁大個棚，請咁多人，都只是收0.1%印花稅，更加冇人會相信竟然有人唔做可以抽水的生意。
世界上有一套系統叫SWIFT，名義上是比利時，實際上是美國，當大家用美元交易時，就要經過這套系統，尤其是買賣石油，銀碼很大，即使在兌換率抽少少水，利潤已經很高。這套系統不但是生財工具，而且是殺人利器，如果唔准任何人，甚至任何國家用SWIFT，他們便會立刻回到金融的原始時代，所以，有人話SWIFT是金融核彈。
由於威力太大，大家都想方法敬而遠之，但過往只是美國會向一些不喜歡的人物禁止用SWIFT，對其他人的影響亦不算得很大，今次因為俄烏沖突，歐美禁止俄羅斯用SWIFT，如果俄羅斯沒有能源糧食，相信立刻要投降，就好似德國、法國，如果禁止他們用SWIFT，地位立刻低過立陶宛。俄羅斯早有準備，推出盧布支付系統，盧布與黃金、石油、糧食掛勾，變相是金本位，其他國家有見及此，就會想辦法繞過SWIFT系統，否則被美國制裁的時候就會踢哂腳，SWIFT的作用亦會慢慢失去，快則十年內就會自我解體，除非歐美將俄羅斯重新納入SWIFT系統，並且宣布在任何情況下，都唔會將任何國家踢出SWIFT系統。否則，將會有很多新系統出現，SWIFT時日無多。
