加密貨幣嘅泡沫升幅，令其他泡沫例如股票同地產完全唔入流。泡沫其實都有好多層次，例如啤酒泡沫，泡沫消散後，仲有杯啤酒過你飲。但如果係梳乎厘嘅泡沫，入口有如空氣，咁就正如股票前輩所講，買資產買着空氣，遲早渣都冇。
加密貨幣嘅泡沫，就係可以渣都冇。只不過，佢哋嘅泡沫仍未成形，仲有好大改變空間。Bitcoin面世差唔多10年，係今年你先聽過仲參與買過，3年前Bitcoin仲係小眾玩意，今日已經討論佢會否代替黃金。
下年泡沫會變成怎樣，冇人預到。一朝梳乎厘由虛變實成為蛋糕，到時就冇人話係龐氏騙局。都係嗰句，你成世人都活在泡沫年代，如果一聽泡沫你就行開，你而家應該幾窮。
香港房地產都話係泡沫，但係教授買泡沫，地產大炒家又買泡沫，眼都唔眨，點解釋？睇淡樓市，唔係應該全部沽晒現貨，等跌市撈底？從來睇淡嘅人做嘅嘢同佢講嘅嘢相反，辯稱為市場一面睇好，自己咁有份量，惟有睇淡，將預測變做賭波開盤，個個買曼城，惟有落注曼聯，平衡啲。市民唔係賭大細，係想聽真實情況。人人講升，你惟有講跌，博人哋錯你啱攞掌聲，大開眼界，害了市民。
香港樓市同比特幣一樣，易升難跌， 因為想沽嘅人唔多。買咗樓唔敢沽嘅人大把，6千萬沽咗層樓，你覺得佢好有錢，但佢想買番嚟住嘅樓要一億，佢就覺得自己好窮，唔敢沽樓。比特幣一樣，好多幾千蚊沽咗比特幣嘅，而家揼到大髀內側瘀晒，恨錯難返。手上仲有貨嘅，打死唔會沽。以前叫人買股票，買完要放落床下底唔理佢，好多人都做唔到。但係比特幣買咗唔理佢，好多人做到，大家都要等到泡沫爆破一刻，先至心甘命抵。沽壓唔重嘅比特幣，睇升贏面大過睇跌。除非你有貨，否則唔好立亂沽空期貨，輸死你。
今年搵到餐晏仔食。2018年，唔使講，資產組合要有加密貨幣，否則你好難跑贏2017。
