恒生指數昨日收報28639點，升336點，成交1154億。全年最得人驚嘅時刻終於在年尾出現。股樓都由年頭升到年尾，估跌嘅贏面當然比較大，所以個個專家上電視都話小心睇住跌，但係邊個聽專家話買跌就輸到甩褲。去到而家，更加多人話睇跌，但係你夠唔夠膽同全世界對着幹？股市受北水影響，傳統分析方法已經失靈，樓市又何嘗唔係？你用伯爺嗰代嘅思維去分析樓市，慘過你300蚊放晒騰訊，400蚊唔敢再追。
傳統豪宅地段，中半山、山頂、大坑道，呢啲地方應該樓價貴一截啩？錯，以呎價計佢哋仲平過九龍新晉豪宅。油麻地頂層1575實呎賣1億，呢個價錢買到2800實呎愛都連3個車位有找。唔通油麻地地段靚過中半山？買樓唔係話Location Location Location咩？點解有人肯用1億買個景，都唔肯用同等價錢買Location？證明Location係英文，中文「位置」就唔同含意。唔係中環返工嘅，中半山位置一啲都唔好，又迫又吊腳，仲坐南向北，食正西北風。西九係運輸重鎮，將來仲係行國內法律，底氣夠，呢啲先係地利。
傳統豪宅，你睇過嘅話，嚇死你。樓底矮、大堂舊、會所殘、車位冇蓋，外牆可以維修，但30年水渠冇得搞。好多業主住千幾二千呎，內櫳同公屋冇分別，露台對住對面分體式冷氣機。新晉豪宅，大堂已經搞到人哋台慶一樣金碧輝煌，管理員企响酒店式櫃台後面，變身禮賓員，
朝朝乜生前乜太後，好不親切。裝修一律歐洲式，指定配件Miele 或者 Gaggenau，唔煮飯都可以當裝飾品。最緊要係會所夠靚，你買完層樓都冇乜錢剩，放假去會所做吓運動，夜晚煮吓飯仔又一日。況且室雅何需大，有部手機上網就天下我有，世界盡在我手。香港地咁細又塞車，南昌站搭車去ifc，可能仲快過你响MOUNT NICHOLSON司機車你經花園道落山。咁你話，你住location還是住真豪宅？
不過，Location另一個含意，係neighbourhood。而家300呎嘅劏房樓同3000呎嘅頂樓放响同一幢大廈賣，相同Location但不一樣嘅neighbourhood。山頂是一種neighbourhood，西九是另一種。傳統智慧買地段，今天嘅環境買鄰居。要住，梗係住响啲可以問隔籬借鹽，出入會講聲早晨，入電梯會等埋嘅鄰舍旁邊。
要控制樓價，其實好容易，我有絕橋。澳洲唔准外國人買二手樓，全部要買新樓，目的係唔想外國人買走啲現存精品，要佢哋通通俾當地發展商鋸。香港要反轉嚟行，應該唔准非本地出生人士買新樓，通通要佢哋買二手樓。這樣，現行業主可以賣舊樓畀非本地出生人士，大賺一筆，夠晒首期買新樓，仲可以享受發展商二按。有咗大批非本地出生嘅購買力，二手轉旺，成交活躍，樓市自然唔會乾升，發展商亦唔可以瘋狂開價。到時樓價受控，市況活躍，香港人又可以upgrade住豪宅，絕對係一大政績。只可惜政府首要服務嘅唔係本地出生人士，目標係將資源調配畀冇响香港長時間交稅嘅人士享用，所以你只可以停留响伯爺年代嘅思維，等抽房協資助房屋。
