Prince Building 嘅 Sevva 要執笠

　　前排各大媒體報導，話係中環太子頂樓嘅 Sevva 酒吧做到明年五月租約滿，就唔續約關門大吉。我仲以為睇錯，真係唔係幾相信自己嘅兩隻眼球。不過舊年就有唔少嘅金融界外籍朋友，因為上頭業務調整，又有做商務律師會計師外籍朋友，相繼舉家離港返美利堅合眾國，話暫時冇計畫會返來香港做嘢。因為大家見面多在放工後食晚飯飲酒，好少打爛沙煲問究竟。自三年前新冠疫情搞到雞飛狗跳，其間返香港好唔方便夾飛機票超貴，又怕坐飛機中招概率高，就疊埋心水唔出門。

　　今年疫情隔離放鬆，就雞咁腳返香港，當然又北上神州大地趴趴走啦。先以為經濟歷經三年嘅慘痛失血，取消隔離後經濟會有報復性反彈，睇來只不過係一廂情願。舊年入冬恒指跌到萬四反彈，好彩啲吹水朋友一早就轉換陣地去咗炒道指，應該避咗凶趨咗吉。依家恒指係二萬點樓下冇堅持幾耐，又拾級而下。班靠金融市場揾食嘅朋友今年 IPO 冇生意，拍烏蠅，又難怪呢間以佢哋呢班友做完大 Deal 之後，一齊慶祝有靚佣金落袋，習慣聚會飲香檳飲靚紅酒嘅 Sevva。

　　既有上流社會嘅氣派，又有三百六十度係晚霞同維港嘅色彩裡沉醉金迷。正如 Sevva 讀音，甚似法文嘅 Savoure，細膩玩味紅燈映綠酒嘅時光。據說呢間餐廳酒吧嘅名字 Sevva 源自梵文 Seva，意思係無私的奉獻。呢間位於東方之珠東方華爾街嘅香港中環，雖然第二十五層樓頂低啲，但有無敵海景，俾人有俯視世界嘅氣慨。Sevva 個名亦有俾人印度苦行僧嘅神秘味道，幾啱係金融市場打滾嘅 Golden Boy 口味。餐飲係 Fusion 風格，餐廳設計自成一格，既溫暖舒適，又有真正豪華生活品味。據說酒吧老闆娘話顧客量已經恢復到疫情前，但佢似乎對於香港嘅未來有新嘅睇法。唔知係唔係佢以前喜歡 Fusion，係高腳杯品嘗波爾多列級酒莊，唔習慣很快將來可能要乾茅臺酒而興趣索然。