最近中原地產老細老施言之鑿鑿，以他作為香港地產仲介一哥嘅江湖地位，手握香港地產賣買一手資料外，更有對市場最前線動態嘅把握，佢嘅一言一動影響香港本地嘅潛在買家作出購買磚頭決定外，對北水南流而為住房價格有所支撐更顯然而見。據說最近香港新建私人樓宇嘅成交，超過半數有數千宗成交係講普通話嘅買家，以至中原城市領先指數止跌稍有回升。有數字嘅支援下，亦難怪老施作為一直喺佢自己個行嘅龍頭，又一直係香港地產嘅大好友，好似我其他地產界朋友，在商言商希望地產市道重拾信心，用更進取嘅態度對待已經跌咗25.53%嘅私人樓宇價格，當然係好正常不過。
雖然話大家見到嘅都係一樣嘢一樣資料，分析時可能有唔同嘅角度，更何況有唔同嘅權重。我覺得有幾方面，可
能老施忽略咗，影響佢對香港地產價格嘅分析。其一，香港食正作為中西橋樑嘅角色部分(中美之間)已經消失。早年來香港嘅繁榮景氣，以至港府庫房滿瀉而香港亦年年加人工，支撐著凱歌猛進嘅香港地產價格，香港亦榮登全球最貴地產價格寶座。如果我估計冇錯，香港可能會面對就業困難甚至減薪嘅窘境。其二，香港人口老化，而近在咫尺嘅深圳珠海嘅地房價格遠遠低於香港，為細水長流嘅對香港樓價形成壓力，有更多業主會拋售房產而北上養老。其三，會買樓嘅新力軍一代，會覺得當今樓價依然貴，高價置業綑綁二十年風險大。老施話地產價格將來六年會升85%，你信唔信？
