茶餐廳亂話（1198）入伙時管理費大幅上升是值得恭喜
2021年9月17日
今早去到茶餐廳，有客人話在2013年在英國買了一層樓，買樓時話管理費每年4鎊幾一呎，到最近收樓，管理費每年加了兩鎊一呎，折算下，大約是每月6港元一呎，客人問算唔算貴。
我話好貴到無倫，我住的地方是禮賓式管理，5千幾呎亦只不到萬五元，管理費唔超過每月三元一呎，客人的英國樓管理費雖然貴，但值得恭喜，因為樓價大幅上升，地產商才夠膽加管理費，如果有買家不滿意，可以退回已買的單位，估計不會有買家退貨，英國地產商就可以過骨，如果樓價下跌，地產商是不敢加管理費，否則，真的會有買家退回已買的單位，不過，今次英國地產商真係食到盡，每呎每年6鎊，禮賓式服務是不足夠，應該要提供管家式服務，客人話，肉在砧板上，冇辦法，貴都要俾，唔通要地產商退錢。
地產商今次可能因小失大，以後該名地產商所發展的樓盤，買家就會提高警覺，例如要地產商擔保在入伙後幾多年唔能夠加管理費，同時管理公司要接受業主監察，其實，英國佬當香港人是水魚，有咁盡劏到咁盡。
