昨日是盂蘭節，早上去到茶餐廳，見到老闆大娘準備一大堆生活必需品禮包，並且叫廚房準備200人飯盒，送給一些有需要的人，這是一些善長人翁在盂蘭節指定動作，有客人同大娘點解唔派錢，乾淨俐落，又唔使自己煩，大娘話，如果派錢，那些受惠者收咗錢之後唔捨得食，反而幫唔到他們，大娘的話絕對有道理，全世界最慳儉是兩種人，一是賭仔，二是老人，不過，畀錢賭仔就會輸咗去，畀錢老人就會收埋。
有不少醫護人員認為今次政府提倡的全民檢測，不如直接派3千元，一定會有效得多，我認為那些名醫可能
未做過善事，全民派3千元就很容易，但叫那些收了3千元的人用2千元去做檢測就很困難，由於是醫療券，很多收了錢的市民會將3千元用作其他醫療服務，但就唔會用3千元去檢測，最後去檢測的人數太少，政府可能要再做一次全民檢測，通關的時間可能要推遲，香港經濟復甦就失了先機，甚至變得遙遙無期。
今次美其名是全民檢測，但要求全港750萬人去做是沒有可能，如果有大約100萬人去做檢測已經是唔錯，而所得出結果是陽性的比例太低，譬如只得100個人有陽性反應，香港就有條件局部解封，如果唔做測試，大家都是得個「估」字，就算香港政府夠膽，其他國家都不會接受香港解封。
雖然有很多年輕人呼籲不要去做測檢，但事實上測檢重要性對年輕人來說比長者大得多，不少長者已經退休，香港是否解封對他們影響不大，但如果不解封，香港經濟就不會有起色，失業率亦會大幅增加，受害者都是正在工作或者搵工的年輕人，杯葛測檢即是杯葛自己飯碗，實在不值得鼓勵，但如果以政治掛帥又當別論。
