今日驚蟄，早上去茶餐廳食早餐時，路過鵝頸橋，見到不少女士打小人。有一位女士鬧正在打小人的女人，問點解要打佢，原來打小人的女人才是小三，鬧人的是
正印。今次真係世界變，那位正印女士我認識，我唔想佢出醜，於是話我認識的女士差不多全部都被人當小人打過。正所謂不招人妒是庸才，被人當小人打有什麼問題，冇人打才冇面，根本是皮肉不到，打人那位女士才是實質受害人。阿嫂聽到我講之後很開心走了，我又做了一件好事。其實驚蟄打小人好似聯儲局減息救經濟，唔會有實質效果。
往時大家提到驚蟄，大多數會聯想到打小人。不過今年唔同，全世界受到新冠肺炎病毒蹂躪，疫苗還未研發出來，現在唯有寄望驚蟄春雷，驚醒所有蛇蟲鼠蟻一起開餐食病毒，細菌，疫情才有機會被遏止。雖然有人話這是通勝上的傳說。其實，傳說是經過統計，或者可以叫做統計學。
去到茶餐廳，見到一個老友在座，佢問聯儲局減息½%，理論上道指應該狂升，而且在未減息之前已經升了1,293點，但點解在減息後道指不升反跌，仲要跌875點咁多。我問老友記唔記得幾十年前，他向現在的老婆求婚，在未求婚之前是極度亢奮，但求婚成功之後反而很失落，知道以後失去自由，又要養家，很多時好消息被確認之後就變成確診，亢奮變成沮喪。不過，這只是道指下跌原因之一。
另外一個原因是減息只是頭痛醫腳。我唔信美國人不知道全球經濟轉壞是因為新冠肺炎病毒肆虐，減息究竟有何作用，正確做法是「圍、堵、追、尋」，盡快製造疫苗，而不是叫國人在家裡等死，待疫情受到控制之後，才減息救經濟。現在減息，好似驚蟄打小人，收唔到了實質效果，反而是浪費彈藥。幾個月之後，當疫情緩和，美國已經無餘力減息救經濟。屆時，鮑威爾就會覺得太早減息。
