老闆話年初三赤口，不宜拜年，不如去茶餐廳吹水食年糕。其實，老闆叫到，又點止年糕咁簡單。既然忙了兩日同家人拜年，今日恢復正常，何不晏些少才去跑步？跑完步去茶餐廳食年糕。
當我去到茶餐廳，見到老闆講三國演義講到眉飛色舞。老闆講十八路諸候與董卓決戰虎牢關，最初呂布手下
華雄連斬十八路諸候幾員猛將，關羽以一個馬弓手身分出戰。跟著就是大家熟悉的關公杯酒斬華雄，其後呂布親身上陣，關羽先上陣，但不能抵擋。張飛幫拖後取得優勢，劉備想執死雞，提雙股劍上陣，反而被呂布突圍而去。這是大家都非常熟悉的三英戰呂布，雖然老闆講得很動聽，但反應未如理想，老闆問我點解？三國演義是歷史故事，大家都耳熟能詳，好似一場已經有結果的足球賽事，收視率一定不會很高。直播又唔同，老闆話明白。
有年輕熟客打算買樓，已經俾了offer幾日，業主遲遲未有回覆，問我有何良策？我話不如來一招「三英戰呂布」，搵兩個老友充當買家，經其他的物業代理俾offer，樓價大約比真正的offer低8至12%。業主見樓價愈來愈低，個心會愈來愈慌。如果有心賣的話，一定會接受那位熟客的出價。我講完之後發覺在茶餐廳內的人都非常用心聆聽。其實，就算講歷史故事，一定要加插一些現實情節，才會有吸引力。不過，一般歷史學教授只懂得搬字過紙，所以，歷史變成一門不吸引的學問。
