昨日已經約定茶餐廳老闆睇波，當然在茶餐廳內，老闆話已經準備好鮮魚片，龍蝦
，加任食靚肥牛，十一點開始，邊食邊睇，還有幾個街坊，當然是我帶酒，要襯得起老闆靚料，就要用2枝25年Highland Park ，都唔知道夠唔夠，老闆話同我賭一舖，輸家全部埋單，我話好，不過盤口由我定，而且由我先買，曼聯讓兩球，贏一球是我輸，就此決定，老闆問我點解咁有信心，是不是近兩場大勇的曼聯小將連格話今晚要將曼市染紅，我話不是，我相信連格今晚連正選都未必有，今晚我話曼聯贏並不是因為曼聯大勇，而是曼城已有強弩之末感覺，我大膽講，今晚有十隊以上英超球可以贏曼城，曼聯只不過是適逢其會。
在最近幾場波，曼城只能在補時或者最後階段反敗為勝，一場可以說是鬥心，連續幾場反而是幸運成份居多，好似上星期股市大跌前，連續幾日先跌後回穩，但最後都是在沒有特別壞的情況下大跌600幾點，曼城總要輸一場大大鑊，教練哥迪奧那才會大膽調整陣容，老闆其實沒有聽我亂說，他只講了一句多謝。
