茶餐廳亂話（55）神仙過鐵橋

　　今日初三，一般人叫做「赤口」，我因為從年尾到年初有很多飲宴，高蛋白質食物太多，打算今日戒口，今早在跑步時，茶餐廳老闆話今日開市，請我去食早餐，其實，那位茶餐廳老闆有一個習慣，就是今日回饋熟客，識得的顧客唔收費，唔識得就收雙倍，我本來唔打算去，無謂令老闆誤會我想食免費早餐，但佢叫到又唔同，更何況我有T恤放在那?，我跑完步可以換衫。

　　今日的早餐並不是水煮麥皮，而是「紅運當頭」早餐，即是過年一般食品，加一杯靚咖啡，在食早餐的時候，有知我是在澳門長大的顧客問我，有沒有必贏之術，今次在澳門贏錢女士是不是找到了一個必贏的方法，我話，那位女士的事業心胸很大，佢搵到一個必贏方法亦未可料，不過，我是有幾個接近必贏的方法，其中一個叫「神仙過鐵橋」，咦，點解其他顧客都坐近，我唔想講都唔得。

　　這個方法一般人澳門人都知道，叫「神仙過鐡橋」，就輸一買二，輸二買四，無論輸了幾多次，只是有一次贏，都是贏一，雖然是以大博小，很少人會這樣做，但賭場亦防範於未然，對付方法就是限紅，由最低到最高投注金額，只能夠過五次，即是話，如果五次都不能贏，賭錢的人就輸了31注，鐡橋都斷了。

　　今日，有一班年輕朋友入場賭馬，我話有，叫「神仙過鐡橋」，就是開始時用100元買一隻賠率超過二的大熱門，如果輸了，就用200元，再輸就要用400元，跟著是800元，1,600元，如果再輸就唔好賭，今年都唔好賭，用這個方法最好的結果是贏百多元，最壞的結果是輸3,100元，有做精算的朋友同我講，每一年賽馬，連續五場大熱門落敗的次數很少，所以，我話這是一個接近必贏方法，但一定要遵守的規則是注碼一定要按規定，賠率一定超過二，如果賠率低過二的就唔好賭，我講的時候，原來茶餐廳停止運作十五分鐘，有熟客問我有沒有其他方法，當然有，明天再講。