茶餐廳亂話（10）花雕，加飯，善釀

　　老友在三個星期之後請食大閘蟹，話一定要搞得好好睇睇，今次不在天香樓請客，要自己配酒，佢知道我阿嫲外家在澳門開酒莊，問我如何配酒，我很奇怪，我阿嫲的外家開酒莊與我有什麼關係，不過，我的確對黃酒有多少硏究，食大閘蟹配16至18年花雕就最好，老友問點解，我話以前的人在女兒出世當年，便釀一批黃酒，亦即是花雕，待女兒出嫁當日，便會打開個酒酲享用，叫做女兒紅，那時候，出嫁年齡在16至18歲，所以，我認為16至18年花雕最好飲，老友話明白。

　　老友講完明白之後唔夠一分鐘又問我，佢話去買酒時，見到有一些酒叫加飯，店員話是花雕的一種，但比花雕更高級，有什麼分別，其實，花雕同加飯都是黃酒的一種，但加飯級數以上的太甜，調酒專家會將二者混合，做成最好花雕，在香港，我知道天香樓韓家就做得最好，其他的我就不知道。

　　老友問我黃酒點解會分為花雕同加飯，很簡單，蒸了兩次的黃酒叫花雕，顧名思義，加了飯再蒸第三次叫加飯，蒸了四次的叫善釀，跟著是元紅，到香雪，每高一個級數，糖份更高，更甜，現在已經很少人會單飲那些黃酒，花雕除外，老友又話明白，跟著唔夠一分鐘又問我，點解台灣人飲花雕要加話梅，我話有時間再答。