樓市不解之謎（13）是反價抑或是提高叫價

　　有學者問我點解近日屯門有業主反價28%，而我話樓市的聲音不大美妙，我話這是報導引述錯誤，那位業主並沒有反價，他只不過是提高叫價，兩者是有分別，或者，那位業主根本沒有打算賣走那個物業，極有可能是他惟一的自住物業，根本唔會賣走，他只不過是秤身家，向其他人炫耀他自住的單位如何值錢，其實，屯門一個單位，值錢極都有限，何必炫耀，但有人唔同意我的講法，認為那位業主是有心賣，提高叫價可以令到有心買樓的人追價，是銷售策略之一，或者有可能，但有心賣樓，就不能夠提高叫價三成，會嚇走有心買那個物業的買家。

　　多年前，有老友打算賣走一個一億元物業，已經有目標買家，但遲遲未肯扑鎚，老友打算自動減價一成，希望早日成事，我話千祈唔好，這樣做會嚇窒那個買家，或者他會希望老友繼續減價而不會落訂，急都急唔嚟，倒不如封盤，兩個星期之後再賣，加價5%，對方沒有反應，再封盤，再加價5%，對方話我老友傻左，賣唔出仲加價，我叫老友唔好理，再封盤，再加價5%，今次，對方很大反應話唔好再加，他願意出原價一億元，我叫老友唔好接受，只可以唔加最後一次價，最後成交價是一億一千萬元，由始至終，我老友並沒有反價，他只不過是提高叫價。