最煩是老友問借錢

　　我相信很多人曾經面對被老友借錢的煩惱，如果拒借，立刻冇老友做，如果借，叫對方還清的時候亦沒有老友做，其實，有一些問別人借錢的人，他們並不是急需，只不過是睇啱一種投資產品，問人借錢投資，老實說，借錢給那些人，九成九都冇得還，如果他們賺錢，就會清還利息，本金就會拖住先，如果蝕錢，就會對債主說他投資失利，冇錢還，債主唔好彩，試問，既然一早知道有如此結局，我認為應該一早拒絕，就算冇老友做都係咁話。

　　在去年，樓價屢創新高，不少年輕人除了問父母借錢買樓之外，還會問另外一些朋友借錢，美其名是上車，其實，大多數是有投機心態，今年樓價下跌，有一些問人借錢買樓的人除了冇錢還之外，還會怨恨借錢給他買樓的人，認為如果當日他們唔肯借，佢就買唔成，今日就唔會有所損失，即是話借錢俾佢買樓的人害咗佢，試問點解要借錢俾人投資。

　　有人話朋友有通財之義，互相之間幫忙亦是應該，不過，問朋友借錢之前應該要考慮，他日還錢之後朋友反過來問借錢，他們會唔會借，如果唔會，就千祈唔好問人借錢，否則，一定會給別人講壞話，所以，錢銀方面，莫講是朋友，就算是兄弟都要均真，這樣做，就不會因財失義。