當兩位局長被離職時，我的文章中表明高永文將會是下一位被離職的官員，但高局長民望高，CY未必夠膽炒佢，另一位我曾經考慮的是蘇錦樑，因為佢處理頻譜，香港電視，亞洲電視等工作未臻完善，港台又唔聽話，但他可能是執行者，要炒都未必輪到佢，同時，政府可能受到高人指點，講明唔會再有局長被炒，本來事情已經告一段落，但風雲突起，梁家榮被委任做廣播處處長，鄧忍光沒有被離職，估計將會做海關關長，離開大熱㕑房港台，海關關長只不過是踏腳石，下一個職位應該是局長，睇戲我們經常睇到做臥底的探員，回到警隊後很快升職，幾個月後，鄧忍光做局長，大家千祈唔好覺得奇怪。
日本仔侵華時，在中國東北設立731部隊實驗室，用活人做實驗，其中一個實驗是將活人的手放入冰水中，過了一段時間，用鋸將這個人的手鋸掉，那人亦不會覺得痛楚，十幾年前，我的手腕因為長期打羽毛球緣故，醫生同我講，我隻右手已廢掉，叫我練左手簽名，後來，羽毛球國家隊軍醫用冰水療法，今日，我依然可以打羽毛球，今次政府處理港台，亦用了類似冰水療法，我相信是有機會。
鄧忍光做了幾年廣播處長，強政勵治，港台中人知道政府底線，亦不寄以厚望，今次鄧忍光功成身退，梁家榮接任，政策稍為寬鬆，港台中人亦會開心，這就是冰水療法，是否能夠成功就不得而知，當日我接受冰水療法時，軍醫同我講，如果不成功，就要打類固醇，今次，港台的冰水療法是否成功就言之過早，如果不成功就要打類固醇，而類固醇是什麼，我知道，不過唔敢講，但我夠膽講，梁家榮是捱義氣。
