為他人作嫁衣裳的新居屋

　　政府最終都知道市民心目中的房屋政策是買樓，而不是上樓，於是，在未來十年，加建一萬個居屋單位，本來，這是一件好事，但政府處理手法不佳，新居屋變成為地產商作嫁衣裳，到最後，地產商新樓盤賣個滿堂紅，居屋就會滯銷，最弊的是居屋即使滯銷，都不能減價促銷，我相信大部份官員都不會明白，點解我話新居屋是為他人作嫁衣裳，其實，少少深奧都冇，一講就明。

　　政府推出居屋是了卻市民置業心願，售價只是市價七折，市民知道當然開心，有十九萬人攞申請表，CY民望繼續上升，本來，市價七折是一個虛數，不需要公報，或者到售樓前參考其他地產商的新盤售價才公報，應該是萬無一失，但唔知邊個官員畫公仔畫出腸，仲整個箭嘴寫明此乃腸也，在居屋發售前三個月已經公佈售價，亦即是自揭底牌，同時，居屋售價確認私人樓宇價值，亦即是表示政府接受現時樓價，這是一個非常重要訊息，地產商知道這個訊息之後，就會想辦法打抵這個對手，其實一點也不困難，只要將售價降低，達到新居屋售價是新樓盤85折左右，市民就會比較新居屋與新樓盤，結果就是忘記新居屋申請，所以，十九萬張申請表被攞走，只得五千個入表申請，只得3%，房屋官員應該唔識得笑，地產商就笑到見牙唔見眼，東環首批三百個單位一Q清袋，老太話回饋市民，不加價加堆百五個單位，賺錢之餘仲大獲好評，買到樓的人好似執到金咁開心，這就是做生意的最高境界。

　　東環打頭陣，仲有三個月居屋才開售，我唔知道邊個守尾門，一定不會是白表，到居屋開售，就已經是水尾，賣到一半已經好叻，咁樣，買到居屋的人會不會開心，我會相信政府官員講，新居屋買家好似執到金咁開心，以往市民買居屋，他們明知道質素很難與地產商相比，但有一樣嘢一定比地產商優勝，就是實用率高，但自從政府對新樓的實用面積嚴加管制之後，這個優勢也消失。話雖如此，就算居屋滯銷，他已經完成一個不可能任務，就是迫地產商減價，得益的人當然是巿民，所以，我建議政府如果有機會再賣居屋時，儘量將售價降低，明明賣四百萬賣二百八萬，迫使地產商開賣的新樓盤大幅低於四百萬，如果是85折就是三百四萬，有人話這招叫做借力打力，其實是兵法最高招，不戰而屈人之兵，而且，一定沒有人講官商勾結，不過，政府唔會做，起居屋都是要搵錢補貼公屋，房協冇錢，大家見諒。