這是一個教師朋友的分享：
呢位C9 响baby kingdom 寫得非常中肯，唔係反佔中，亦非支持佔中，寫出了現時境況。
C9 寫給現時佔中的大學生們 :
我都係大學生, 不過已經畢左業好耐, 話唔定你地啲學生仲係係我師弟/師妹。
佔中對我的日常生活幾乎無影響, 對我黎講, 只係唔出去旺角/尖咀/CWB呢D購物區，坦白講， 自從越來越多自由行後，我亦好少去呢幾個地區。
我唔會評論你佔中的觀點，因為你地追求係一個你地理想的社會制度/烏托邦，一個願景，每個人追求的願景唔同，所以我唔會評論，但亦因此，你地唔可以話你地為左香港人的下一代，你的願景不代表我，同樣亦不代要所有香港人。
我想同你討論既係策略性的層面，追求普選係目的，佔中係手段，但佔中唔係政治運動，係一個社會運動, 兩者有好大分別。
政治SHOW的目的係要MAKE NOISE，要有亮點，引起群眾的注意而激發對政治議題的討論, 所以NOISE越大越好，通常由政客主導，但持續性好短。
社會運動通常由民間自發，係可持續的，通過一個可持續的運動/群眾壓力去迫使政府做一D改變，亦即通過民意去迫政府做野。
如果你明白呢點, 我想你或許會明白點解呢個運動越來越處於下風，因為用錯方法。
佔領馬路/催淚彈已經達到激發起民眾注意呢件事的目的，你地應該由政治運動轉為社會運動， 用一D可持續的方法去繼續爭取民眾的支持。可惜，亦因為DRAW到ATTENTION, 你地以為呢個方法成功可繼續用，馬路唔係你地最大的籌碼，民意先係。挾持馬路會直接影響市民的生活/生計，民意一逆轉，成個運動就玩完。
雖然佔中既目的係普選，但有好多市民係被催淚彈激發出黎，佢地未必對普選持強烈意見。
而且, 好多市民係因為不滿社會/政府而走出黎，當中夾雜好多議題: 自由行，電視發牌，學位，高鐵，高樓價，資源分薄等等。。。所以其實市民有點騎劫佔中，通過佔中發洩佢地的不滿。
佔中無可能一次過解決呢D問題， 即使有真普選都未必得， 亦唔係一時三刻可以解決。
當一個社會運動夾雜咁多雜題， 係好難動員所有參與者， 所以內訌問題亦開始浮現。
再者，攪社會運動都好講政治智慧，要審時度勢，要知幾時進幾時退。三個發起團體入面，佔中 3 子最聰明，識得見民意下滑就出黎道個歉。黃之鋒都唔差，講野有感染力，但可惜太心雄，學聯俾人感覺舉旗不定，有勇無謀。
呢3個團體本來協調好應可互補不足，可惜始終大家都有D各自為政, 因為各自的利益著眼點不同。
政府比較有政治智慧，知道強硬唔得即變陣用軟功。再加上知道民意係社運重點，只要打消耗戰便有勝算。
最後，校園始終係一個比較單純的世界，我指單純係因為你接觸的人好大部分係單一族群，亦即學生，大部分學生有著差不多的經歷。
他日你出黎工作後，你會接觸到唔同層面的人(年紀，背景，社會地位，等等)， 每個人有唔同的背景，唔同的歷練，佢地的歷練會直接影響佢地的睇法。當你明白呢個社會的多元化，你會明白點解會有人唔支持佔中，甚至會有人接受假普選。
所以點解咁多老人家反佔中，唔係因為佢地收左錢維穩，而係佢地後生時經歷過動盪的時代，好多人在文革或抗日戰爭逃到香港，所以佢地先咁害怕社會不穩。
大學生們，我唔希望你再問人唔佔中可以點做？或有乜更好的方法？呢個係你地的願景，應該由你地自己去諗辦法。
