蘇守忠（1941年－），香港社會運動人士，1966年香港天星小輪加價事件發起人，1996年在大嶼山寶蓮寺受三壇大戒，剃度為僧，法號曜樂比丘

am專訪】香港脫離英國百年統治已16年，但仍有一些老左派在扣帽子式點評「港英餘孽」，有如活在「反英抗暴」年代。73歲的蘇守忠，四十七年前因天星小輪加價五仙，年輕的心怒火與道德勇氣迸發，獨自絕食抗議結果觸發騷亂，半世紀過去，早已看破紅塵剃度出家的蘇守忠，依然充滿革命鬥爭色彩，批英反美不亦樂乎，並診斷香港人有「恐共症」，這名香港公民抗命的先行者，對「佔領中環」更視為大逆不道，狠批「搞亂」香港。記者：鄭秀韻    攝影：林振東
眼前一位出家人，卻像透「維園阿伯」，逢泛民必反，每逢叫喊「倒梁」、推動「佔中」，他都一一狠批，連帶遊行隊伍中有人舉「龍獅旗」，他亦算到泛民頭上，那管舉旗的只是小市民。香港近年遊行示威不斷，蘇守忠歸因於香港人無知患上「恐共症」，令香港「亂到好緊要」，「成日不停咁嘈，你嘈得多人哋都厭，有冇效先？」對於法律學者戴耀廷倡議佔領中環爭取真普選，他連珠炮發，「佔領中環根本破壞香港經濟，搞亂香港………呢啲懵人讀壞書，中晒西方嘅毒………」

他批評一些人盲目相信西方的所謂民主，「你照搬西方嘅嘢唔掂，有啲恐共症，香港人知識水準又低，未去到獨立思考層面，讀歷史讀到唔三唔四，國民教育都反對，即係冇根嘅？冇祖先嘅？班人冇五倫嘅？一味西方嗰啲，不知所謂，呢啲根本冇晒倫理。」他還用俗語說：「佢(哋)想西方嗰套普選咋嘛，呢啲真係『聞』美國佬狗屎『聞』得多，不知所謂………」
他多次指香港人有恐共症，「啲人一聽見恐共症，傻㗎，有冇認真睇過中共黨史？有冇認真睇過佢啲鬥爭史？」他認為泛民背後有英美勢力唆使，從中渾水摸魚，記者問他英美搞亂香港有何得益，他一副教訓口吻：「你對英美(歷史)睇得好少………」
 

批佔中幼稚質疑道德勇氣
記者問及若佔領中環有很多香港人支持，問題還未說完，他便搶白：「多人唔代表真理，我呢個傻人點解66年走出嚟，即係話得一個有道德勇氣嘅人………(當時)根本可以隨時死人，嗰時差佬權力咁大，我朋友(盧麒)19歲死咗，你睇呢班人有冇道德勇氣先？」佔領中環倡議者強調這是一場覺醒運動，他不屑一顧，「其實好幼稚，你佔領中環就代表你好民主咩？你能夠爭取到嗰啲嘢嘞咩………」
問他是否一生「反殖」？「呢個講法唔係錯，而係awareness(覺醒)………」那麼香港人是否要盲目愛國？他有點動氣，「唔係盲目………」他繼而滔滔不絕，「我覺得班香港人無知，真係未開腦………佢哋真係冇讀歷史，你鬧中共，嗰個係你敵人，你都唔了解敵人，點對付佢嚟知己知彼呀？」他再補白，「我反對嘅係無知，你盲目一味見中共就反，你對你嘅敵人都毫無認識，你反咩嘢啫………」
他認同特首要愛國愛港及不能與中央對抗，問他愛國定義，他說：「了解先啦，你都唔花時間了解歷史………」那麼要求「平反六四」是否不愛國的表現？他毫不猶豫說：「唔係」；高喊「結束一黨專政」又如何？他思考片刻，「唔………好自然發生嘅，多黨未必一定好………所謂多黨即係不同聲音，中共唔係唔可以批評，根本有啲嘢未做好………」香港人恐共是否源於「六四事件」？「你不能一朝被蛇咬就可以咁，泛民班人搞嚟搞去，想中共搞多次六四，中共點會咁傻呀，錯就錯過，但學生亦有錯………」
他對舉港英「龍獅旗」更深惡痛絕，「港英旗是甚麼東西？愛嚟『抆』屎呀………舉港英旗嘅人不知所謂，你去到英國，英國承認你咩？你是甚麼東西呀？你黃皮膚嘅，你去到咪又係三等公民，你估揸英國護照好威咩？」
 

自言愛國信黨信國家
蘇守忠說自己愛國，那麼愛國是否等同愛黨？他說道：「我都冇資格入黨，未曾有資格入黨！」即曾經想入黨？他頓了數秒說，「我覺得保留自己身份都可貴，問題係我都相信黨、我都相信國家………」他再停頓片刻後說，「但有時佢哋上級嘅嘢會唔會過敏呢？好似艾未未，一個artist(藝術家)喺西方嚟講好受尊重，你對artist咁緊張，人哋覺得你傻傻哋………」他會批評中共，但功蓋於過，「如果唔係共產黨，你同我仲拖住條辮，俾鬼佬踢緊籮柚！」
記者問他年輕時是否共產主義信徒，他答說：「又唔係喎，因為我哋睇到天主教苦行、自我犧牲同約制，都好接近共產黨………」蘇守忠年輕時曾是虔誠天主教徒，96年在寶蓮寺受三壇大戒，剃度為僧，法號曜樂比丘，他認為，「耶穌根本係佛教徒」。出家人向來少講政治，他教人眼前一亮，「冇人敢講，有啲嘢真係好忟憎，你唔出聲唔得！」早於四十七年前他已毋懼殖民地保守氣氛為公義發聲，他形容那股勇氣源自天主教積聚的力量，但那時挺身而出亦非偶然，他於64年在母親安排下，隨中共船隊運送大米到古巴，他當時在船上職位是見習買辦及二管事，「第一次出外離開香港，好似開腦」，他目睹古巴革命後的境況，眼界大開，「古巴革命好romantic(浪漫)」，回程路經已脫離英國的新加坡，「(那趟遠行)啟發我做呢件事」。
他自小看很多書，初期受耶穌影響，接著是印度聖雄甘地，及德國哲學家尼采的《蘇魯支語錄》(此為內地譯法，通譯《查拉圖斯特拉如是說》)，「耶穌同甘地都係以退為進，尼采嗰本勁啲，即係好似毛澤東講嗰句：思想武裝乃是最佳的武裝。」他稱頌甘地的公民抗命，話題又談到佔領中環，同樣是公民抗命，他此刻理性地說，「如果經常咁做會癱瘓香港，當年我抗議亦用呢個方法，唔可以隨便用，做得太多，群眾都唔會同情你，有反感，嗰樣又示威，又呱呱嘈，你唔懂群眾心理，行出嚟issue(議題)嗌唔嗌得響？」

後記─年輕一輩或許對蘇守忠感到陌生，年前社運界保衛皇后碼頭，他曾公開露面，一度成為傳媒追訪對象，記者上周電話約訪，他二話不說即答應，行事爽快，反對佔領中環立場亦毫不忸怩，但他原來不知誰是「戴耀廷」，最初還誤以為是「鍾庭耀」，他亦如實告知每天只看一份報章的專欄版，記者恍然大悟。訪問翌日收到法師來電，著記者報道佔領中環時要小心，但他又希望訪問見報後，可讓人對佔中有所警惕，他慨嘆「啲人唔識珍惜」，並坦言希望見到有人舉「五星旗」，與「龍獅旗」抗衡。法師同日第二度來電，希望提供愛港組織的資料，若然愛港行列日後有一位僧人身影，大家毋須大驚小怪，套用毛澤東所言：「世界上沒有無緣無故的愛，也沒有無緣無故的恨」。